قازاقستان مەن وزبەكستاننىڭ بىرلەسكەن كاسىپورنى ازىق-تۇلىك باعاسىن تۇراقتاندىرادى
«QazTrade» ا ق- نىڭ باس ديرەكتورى نۇرالى بوكەيحانوۆتىڭ ايتۋىنشا، وسى اپتادا بىرلەسكەن قازاق-وزبەك كومپانياسى تىركەلىپ، اشىلدى.
«UZKAZTRADE» ج ش ق تەك تەپە-تەڭ نەگىزدە جۇمىس ىستەيتىن بولادى، ياعني كومپانيانى «QazTrade» وكىلدەرى دە، «UzTrade» كومپانياسىنداعى ارىپتەستەرىمىز دە 50/50 قاعيداتى بويىنشا باسقاراتىن بولادى»، - دەپ ناقتىلادى نۇرالى بوكەيحانوۆ.
بىرلەسكەن ەكسپورتتىق-يمپورتتىق كومپانيانىڭ قىزمەتى قازاقستاندىق تۇتىنۋشىنى كوتەرمە باعامەن كوكونىستەر مەن جەمىستەرمەن قامتاماسىز ەتۋگە باعىتتالعان. بۇل جاعدايدا دەلدالداردىڭ ۇزىن تىزبەگى الىنىپ تاستالادى. مىسالى، وزبەك دەكحانىمەن الدىن الا كەلىسسوزدەر بارىسىندا قازاقستانعا جەمىس-كوكونىس ونىمدەرىن كوتەرمە ساتىپ الۋ تۋرالى ۋاعدالاستىققا قول جەتكىزىلدى.
«كومپانيا پايدا تابۋدى جوسپارلامايتىنىن جانە يمپورتتالاتىن ونىمگە كوممەرتسيالىق مارجا قوسقىسى كەلمەيتىنىن ەسكەرۋ ماڭىزدى. ەڭ از اكىمشىلىك شىعىنداردى جاباتىن شاعىن عانا ۇستەمە اقى بولۋى مۇمكىن. ءبىراق جەتكىزىلىم اۋقىمىن ەسكەرە وتىرىپ، بۇل تاۋاردىڭ تۇپكىلىكتى باعاسىنا ايتارلىقتاي اسەر ەتپەيدى»، - دەپ ءتۇسىندىردى «QazTrade» باسشىسى.
نۇرالى بوكەيحانوۆتىڭ اقپاراتى بويىنشا، وسىنداي بىرلەسكەن قازاقستان-پاكىستان كومپانياسى لاحور قالاسىندا ىسكە قوسىلۋ ساتىسىندا تۇر. سونداي-اق، «QazTrade» جاقىن ارادا تاجىكستان رەسپۋبليكاسىنىڭ دۋشانبە قالاسىندا ءوزىنىڭ ەنشىلەس ۇيىمىن تىركەۋدى جوسپارلاپ وتىر.
قازاقستاندىق قاتىسۋى بار ەكسپورتتىق-يمپورتتىق كومپانيالار الەۋمەتتىك ماڭىزى بار ونىمدەردى الەۋمەتتىك-كاسىپكەرلىك كورپوراتسيالارعا جانە ءىرى ساۋدا جەلىلەرىنە جەتكىزۋمەن اينالىساتىن بولادى. بۇل رەتتە بىرلەسكەن كاسىپورىنداردا قانداي دا ءبىر پرەفەرەنتسيالار بولمايدى. ساتىپ الۋ ۇسىنىلاتىن ءونىمنىڭ باعاسى ورتاشا نارىقتىق باعادان تومەن بولعان جاعدايدا عانا جۇزەگە اسىرىلادى. بۇل ءتاسىل ينفلياتسيانى تاۋارلاردىڭ جەكە پوزيتسيالارىندا ۇستاۋعا مۇمكىندىك بەرەدى.
بىرلەسكەن كومپانيالار قازاقستاندىق ۇن تارتۋ، جەمىس-كوكونىس جانە ماي ونىمدەرىن وزبەكستانعا، پاكىستانعا جانە تاجىكستانعا ەكسپورتتايدى دەپ بولجانۋدا، ءبىراق نارىقتىق شارتتاردا عانا.
«QazTrade» ساۋدا ساياساتىن دامىتۋ ورتالىعى» ا ق شاعىن جانە ورتا بيزنەس كاسىپورىندارىنا وڭدەلگەن تاۋارلاردى ەكسپورتتاۋعا، قازاقستاندىق شيكىزاتتىق ەمەس ءونىمدى وتكىزۋگە جۇمسالعان شىعىنداردىڭ ءبىر بولىگىن وتەۋ بويىنشا مەملەكەتتىك قولداۋ شارالارىن كورسەتەدى، قازاقستاننىڭ ەكسپورتتىق الەۋەتىن ارتتىرۋعا ىقپال ەتەدى. «QazTradە» جالعىز اكسيونەرى قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگى بولىپ تابىلادى.
