قازاقستانداعى اۋعانستان ەلشىلىگىنىڭ عيماراتى تالىپتەرگە بەرىلەدى

استانا. قازاقپارات - قازاقستان اۋعانستاننىڭ جاڭا اكىمشىلىگى ديپلوماتتارىن اككرەديتتەيتىن بولدى. بۇل تۋرالى ب ا ق وكىلدەرىنىڭ قاتىسۋىمەن وتكەن بريفينگىدە ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتتى، دەپ حابارلايدى قازاقپارات ءتىلشىسى.

«اۋعانستاننىڭ جاڭا اكىمشىلىگى بىزگە ديپلوماتتاردى اككرەديتتەۋ تۋرالى ءوتىنىش جولدادى. ءبىز ولاردى تىركەۋ جونىندە شەشىم قابىلدادىق. ايتا كەتەيىن، 2021-جىلدىڭ تامىزىندا بۇرىنعى رەجيم قۇلاعان سوڭ ەلدە «بيلىك ۆاكۋۋمى» پايدا بولدى. اۋعانستان يسلام رەسپۋبليكاسىنىڭ شەتەلدەگى ەلشىلىكتەرى بۇل مەملەكەتتىڭ اتىنان وكىلدىك ەتۋىن توقتاتتى»، - دەدى ايبەك سمادياروۆ.

سىرتقى ىستەر مينيسترلىگىنىڭ رەسمي وكىلى اۋعانستان ماسەلەسى ءالى دە حالىقارالىق قاۋىمداستىقتىڭ قىزۋ تالقىلاۋىندا بولاتىنىن اتاپ ءوتتى.

«كەشە سامارقان قالاسىندا اۋعانستانمەن كورشىلەس ەلدەردىڭ كەزەكتى كەزدەسۋى ءوتتى. ءبىز اۋعانستاننىڭ ءبىرتۇتاس بولعانىن ءارى كوركەيگەنىن قولدايمىز. اۋعانستاننىڭ جاڭا اكىمشىلىگى وكىلدەرىنىڭ بىزگە كەلۋى - مويىنداۋ دەگەندى بىلدىرمەيدى. بۇل ماسەلە ب ۇ ۇ- نىڭ قۇزىرىندا قالادى»، - دەپ اتاپ ءوتتى ايبەك سمادياروۆ.

سونىمەن بىرگە، ول وسىنداي ميسسيالار وزبەكستان، قىرعىزستان، تۇرىكمەنستان، رەسەي، قىتاي، قاتار، بىرىككەن اراب امىرلىكتەرى جانە پاكىستاندا بار ەكەنىن ەسكە سالدى.

ايتا كەتەيىك، 2021-جىلى اۋعانستاننىڭ بيلىگىنە كەلگەن «تاليبان» - قازاقستاندا تىيىم سالىنعان ۇيىمدار قاتارىنا جاتقىزىلعان.