قازاقستاننىڭ شاحماتشى قىزدارى مەن الەم قۇراماسى اراسىنداعى ماتچ باستالدى

استانا. قازاقپارات - ەلوردادا شاحماتتان قازاقستان ايەلدەر قۇراماسىنىڭ الەم قۇراماسىنا قارسى ماتچى باستالدى، دەپ حابارلايدى قازاقپارات ءتىلشىسى.

بۇل جارىس 19- ساۋىرگە دەيىن «استانا» حالىقارالىق قارجى ورتالىعى اۋماعىندا راپيد جانە بليتس تۇرلەرى بويىنشا وتەدى.

ۇلتتىق كوماندانى گروسسمەيستەر گۇلميرا داۋلەتوۆا، الەم قۇراماسىن گروسسمەيستەر دانا رەيزنيەتسە- وزولا باسقارادى. ءار كوماندانىڭ قۇرامىندا 8 ادامنان بار.

«وسىمەن بىرنەشە اپتا بويى قازاقستان استاناسىندا الەمدىك تاريحي وقيعا ءوتىپ جاتىر. الەمدىك شاحماتشىلار - يان نەپومنياشيي مەن دين ليجەن اراسىنداعى جارىستى دۇنيە ءجۇزى باقىلاپ وتىر. وسى مۇمكىندىكتى پايدالانا وتىرىپ، ويىن وتكىزۋ مۇمكىندىگىن بەرگەنى ءۇشىن فيدەگە جانە ونى جوعارى دەڭگەيدە ۇيىمداستىرعانى ءۇشىن ءبىزدىڭ قازاقستاندىق شاحمات فەدەراتسياسىنا العىس ايتقىم كەلەدى. بۇگىن جىلدام شاحماتتان، راپيدتەن العاشقى ويىن وتەدى. ءبىزدىڭ ۇزدىك شاحماتشى قىزدار سايىسقا تۇسەدى، ولارعا ۇلكەن ساتتىلىك تىلەيمىن. مەنىڭ ويىمشا، بۇل شارا وسكەلەڭ ۇرپاققا ۇلگى بولادى. سىزدەرگە قاراپ، ءبىزدىڭ جاس شاحماتشىلار قاتارىڭىزدى تولىقتىراتىنىنا جانە ەلىمىزدە ينتەللەكتۋالدى ويلايتىن ادامدار كوپ بولاتىنىنا سەنىمدىمىن»، - دەپ اتاپ ءوتتى مادەنيەت جانە سپورت ءمينيسترى اسحات ورالوۆ ماتچتىڭ اشىلۋ سالتاناتىندا.

شاحمات ارەناسىندا قازاقستان اتىنان ءبيبىسارا اساۋبايەۆا، جانسايا ابدىمالىك، دينارا ءسادۋاقاسوۆا، مەرۋەرت كاماليدەنوۆا، ليا قۇرمانعاليەۆا، كسەنيا بالابايەۆا، الۋا نۇرمانوۆا، زارينا نۇرعاليەۆا باق سىنايدى.

قازاقستاندىق ويىنشىلارعا قارسى قىتايلىق شاحمات جۇلدىزى، ءتورت دۇركىن الەم چەمپيونى جانە FIDE رەيتينگىندە 1№ شاحماتشى، 29 جاستاعى حوۋ يفان، سونداي-اق اتاقتى نانا زاگنيدزە (گرۋزيا)، حاريكا دريۋناۆاللي (ءۇندىستان)، گيۋناي مامەزادە (ءازىربايجان)، نۋرگيۋل ساليموۆا (بولگاريا)، جوكا گاال (ۆەنگريا) ، شري ب. ساۆيتا (ءۇندىستان)، سونداي-اق افرۋزا حامداموۆا (وزبەكستان) شىعادى.

سونىمەن بىرگە، سالتاناتتى اشىلۋ راسىمىندە جەرەبە تارتىلدى، وندا قازاقستان قۇراماسىنان دينارا ءسادۋاقاسوۆا حوۋ يفانعا قارسىلاس بولاتىنى انىقتالدى.

ەكىنشى تاقتادا حاريكا درۋناۆاللي مەرۋەرت كاماليدەنوۆاعا قارسى وينايدى.

ءۇشىنشى تاقتادا ءبيبىسارا اساۋبايەۆاعا قارسى گيۋناي مامەزادە وينايدى.

ءتورتىنشى تاقتادا نانا زاگنيدزە جانسايا ابدىمالىككە قارسى وينايدى.

قازاقستان شاحمات فەدەراتسياسىنىڭ پرەزيدەنتى تيمۋر تۇرلوۆ ءداستۇر بويىنشا ماتچتىڭ العاشقى ءجۇرىسىن جاسادى.