ارىستانبەك مۇحامەدي ۇلى سوتتا كىناسىن مويىندامادى

استانا. قازاقپارات - ەلوردادا ۇلتتىق مۋزەيدىڭ بۇرىنعى باسشىسى ارىستانبەك مۇحامەدي ۇلىنىڭ ءىسى سوتتا قارالىپ جاتىر. پروتسەسس بارىسىندا ايىپتى كىناسىن مويىندامادى، دەپ حابارلايدى قازاقپارات ءتىلشىسى.

«مەملەكەت باسشىسى قاسىم- جومارت توقايەۆتىڭ جارلىعىن ورىنداۋ ماقساتىندا مەن قازاقستانعا ءۇندىستاننان ۇلتتىق بىرەگەي قازىنا - «التىن ادام» برەندىن تۇتاستاي ءارى امان- ساۋ قايتاردىم. اتالعان مۇرا مەملەكەت باسشىسى جارلىعىنىڭ ۋاقتىلى بەرىلۋىنىڭ ارقاسىندا جانە قازاقستاننىڭ ءۇندىستانداعى ەلشىلىگىنىڭ كومەگىمەن پاندەميا كەزىندە، ياعني لوكداۋن ەنگىزىلگەنگە دەيىن قايتارىلدى»، - دەدى سوتتا ارىستانبەك مۇحامەدي ۇلى.

ونىڭ مالىمەتىنشە، «التىن ادام» ەلىمىزگە 2020 -جىلعى 22-ناۋرىزدا ديپلوماتيالىق پوشتا ارقىلى جەتكىزىلگەن.

«ءۇندىستاندا كارانتين شەكتەۋلەرى 2021 -جىلدىڭ اياعىندا عانا الىنىپ تاستالدى. ەگەر ايىپتاۋ اكتىسىنىڭ نۇسقاۋىنا سۇيەنە وتىرىپ، كوروناۆيرۋس ءورشىپ تۇرعان كەزدە ۇلتتىق مۇرانى ءۇندىستاندا 2 جىلعا جۋىق ۋاقىتقا قالدىرىپ كەتسەك، وندا تەك قازاقستان عانا ەمەس، بۇكىل ادامزات ءۇشىن قادىرلى قازىنامىزدان ايىرىلىپ قالار ەدىك. سوندىقتان مەنى ايىپتاۋ اكتىسىمەن مۇلدەم كەلىسپەيمىن، ءوز كىنامدى تولىق مويىندامايمىن»، - دەيدى ا. مۇحامەدي ۇلى.

بۇعان دەيىن حابارلاعانىمىزداي، سوت ارىستانبەك مۇحامەدي ۇلىن ءۇيقاماققا اۋىستىرۋدان باس تارتتى.

ەسكە سالايىق، ۇلتتىق مۋزەي ديرەكتورى ارىستانبەك مۇحامەدي ۇلى بىلتىر 28-مامىردا قاماۋعا الىنعان ەدى.