سوت ارىستانبەك مۇحامەدي ۇلىن ءۇيقاماققا اۋىستىرۋدان باس تارتتى

استانا. قازاقپارات - سۋديا ۇلتتىق مۋزەيدىڭ بۇرىنعى ديرەكتورى، ءىستى بولىپ جاتقان ارىستانبەك مۇحامەدي ۇلىنىڭ بۇلتارتپاۋ شاراسىن ءۇيقاماققا اۋىستىرۋدان باس تارتتى، دەپ حابارلايدى قازاقپارات ءتىلشىسى.

«ارىستانبەك مۇحامەدي ۇلى مەن كوكشەنوۆ اۋىر قىلمىس جاسادى دەپ ايىپتالىپ وتىر. سونداي- اق، تەرگەۋ سۋدياسىنىڭ قاۋلىسىندا سوتتالۋشىلار بوستاندىقتا بولعان كەزدە قىلمىستىق ءىس بويىنشا وبەكتيۆتى تالقىلاۋعا كەدەرگى كەلتىرۋى نەمەسە سوتتان جاسىرىنۋى مۇمكىن ەكەنى قارالىپ جاتىر. سونىمەن قاتار، ا. مۇحامەدي ۇلىنىڭ اۋرۋى بۇلتارتپاۋ شاراسىن وزگەرتۋگە نەگىز بولا المايدى. سوت تولەيەۆتىڭ ا. مۇحامەدي ۇلىنا قاتىستى قاماۋدا ۇستاۋ تۇرىندەگى تاڭدالعان بۇلتارتپاۋ شاراسىن وزگەرتۋ تۋرالى ءوتىنىشىن قاناعاتتاندىرۋدان باس تارتادى»، - دەدى سوت زالىندا سۋديا باعلان ىدىرىسوۆ.

سونداي- اق، سۋديا كوشەنوۆكە قاتىستى قاماۋدا ۇستاۋ تۇرىندەگى تاڭدالعان بۇلتارتپاۋ شاراسىن وزگەرتۋ ءوتىنىشىن دە قاناعاتتاندىرماي تاستادى.

بۇعان دەيىن استانادا ارىستانبەك مۇحامەدي ۇلىنىڭ ءىسى بويىنشا سوت باستالعانىن جازعان ەدىك.

ايتا كەتەيىك، ءىس بايقوڭىر اۋداندىق №2 سوتىندا قارالىپ جاتىر.

ەسكە سالساق، 2022 -جىلدىڭ 28-مامىرىندا سوت سانكتسياسىمەن ۇلتتىق مۋزەي ديرەكتورى ارىستانبەك مۇحامەدي ۇلى قامالعان بولاتىن.