جاڭا ساۋدا- لوگيستيكالىق ورتالىقتار قۇرۋ جانە سەيسميكالىق اۋديت جۇرگىزۋ: ۇكىمەتتە الماتىنىڭ دامۋ ماسەلەلەرى قارالدى
اتاپ ايتقاندا، ورتالىق مەملەكەتتىك ورگانداردىڭ باسشىلارى 10-ناۋرىزدا ۇكىمەت باسشىسىنىڭ الماتىعا جۇمىس ساپارى اياسىندا بەرگەن تاپسىرمالارىنىڭ ورىندالۋ بارىسى تۋرالى باياندادى.
اڭگىمە وتاندىق تاۋار وندىرۋشىلەردى قولداۋ، «التىنكول» تەمىرجول ستانساسىن دامىتۋدىڭ باس جوسپارىن ازىرلەۋ، بيۋدجەتتىك ينۆەستيتسيالىق جوبالاردىڭ تىزبەسىن كەڭەيتۋ جانە قۇرىلىس سالاسىنداعى باقىلاۋدى كۇشەيتۋ بويىنشا قابىلدانعان شارالار تۋرالى بولدى.
الماتىنىڭ ۇلگىسىمەن رەسپۋبليكانىڭ بارلىق وڭىرلەرىندە شاعىن ونەركاسىپ پاركتەرىن قۇرۋ بويىنشا قادامدار ازىرلەنگەنى جەكە اتاپ ءوتىلدى.
كەڭەسكە قاتىسۋشىلار وڭتۇستىك استاناداعى ساۋدا اعىنىن وڭتايلاندىرىپ، كولىك ينفراقۇرىلىمىن جەڭىلدەتەتۋگە مۇمكىندىك بەرەتىن كوتەرمە تاراتۋ جانە ساۋدا- لوگيستيكالىق ورتالىقتار جەلىسىن دامىتۋ جوسپارلارىن دا تالقىلادى.
سونىمەن قاتار الماتى قالاسىنىڭ باس جوسپارىن جانە الماتى اگلومەراتسياسىن دامىتۋدىڭ 2030 -جىلعا دەيىنگى كەشەندى جوسپارىن ازىرلەۋ تۋرالى، سونداي- اق قالانىڭ سەيسميكالىق قاۋىپسىزدىگىن ارتتىرۋ بويىنشا ۇسىنىستار ازىرلەي وتىرىپ، اۋقىمدى سەيسمواۋديت جۇرگىزۋ تۋرالى بايانداما جاسالدى.
پرەمەر- مينيستر ۇسىنىلعان تاسىلدەردى قولداپ، جوسپارلانعان جۇمىستاردى ساپالى ورىنداۋ قاجەتتىگىن اتاپ ءوتتى.
«اگلومەراتسيانى ەسەپكە الاتىن بولساق، الماتى - حالىق كوپ شوعىرلانعان ەلىمىزدىڭ ەڭ ماڭىزدى وڭىرلەردىڭ ءبىرى. سوندىقتان اكىمدىك پەن بيزنەس تاراپىنان قويىلعان تۇيتكىلدى ماسەلەلەردى جۇيەلى تۇردە شەشۋىمىز كەرەك. جۇمىس ساپارىنىڭ قورىتىندىسىنا سايكەس 28 تاپسىرما بەرىلدى، مەملەكەتتىك ورگاندار ولاردى ۋاقىتىلى ءارى ساپالى ورىنداۋ بويىنشا جۇمىستى جالعاستىرۋى ءتيىس»، — دەدى ءاليحان سمايىلوۆ.
سونداي- اق كەڭەستە الماتى قالاسىنىڭ يندۋستريالدى ايماعىن كەڭەيتۋ، ەكولوگيالىق ماسەلەلەردى شەشۋ، «جايلى مەكتەپ» ۇلتتىق جوباسىن جۇزەگە اسىرۋعا وتاندىق تاۋار وندىرۋشىلەردى تارتۋ، 100 جاڭا ءىرى قوسىمشا ءبىلىم بەرۋ نىساندارىن سالۋ، اۋىل شارۋاشىلىعىنا سۋ ۇنەمدەۋ تەحنولوگيالارىن ەنگىزۋ بويىنشا جانە باسقا دا ءبىرقاتار ماسەلەلەر قارالدى.
