ارگەنتينادا قاريالاردىڭ كۇنكورىسى قيىندادى
ءبىرىن- ءبىرى قولتىقتاعان بۇل كەيۋانالار اپتاسىنا 2 رەت زەينەتكەرلەرگە ارنالعان شاعىن دەمالىس ورتالىعىنا كەلەدى. تاۋى شاعىلىپ، تۇرمىسى اۋىرلاعان قاريالار ءبىر ءسات ويىن ويناپ، بوي جازعان بولادى. ءبىراق ءبارىبىر قۋ تىرشىلىكتەن قۇتىلا المايدى. بالاسى تاسباۋىرعا اينالعاندارى دا جەتەرلىك.
پاۋلينا نادجنۋدەل، زەينەتكەر:
- پاتەراقىمدى تولەي الماي جاتىرمىن. باسقا دا شىعىن باستان اسادى. تاماق تاۋىپ جەۋدىڭ ءوزى مۇڭعا اينالدى. نەگىزى ءوزىمنىڭ 2 بالام بار. ءبىراق ولاردان ەش قايىر جوق. قارنىمنىڭ اشقانىنا، قادىرىمنىڭ قاشقانىنا قىنجىلامىن.
مەرسەدەتس ۆيللافانە، زەينەتكەر:
- ساۋدا جاساعاندا تاماقتى تەك گرامداپ قانا الامىز. كەلىلەپ الۋعا اقشامىز جەتپەيدى. ءبىر ءتۇيىر كارتوپ پەن پيازدىڭ اقشاسىن ارەڭ تولەيمىن.
ارگەنتينادا زەينەتكەرلەردىڭ 85 پايىزدان استامىنىڭ، ياعني 6 جارىم ميلليون قاريانىڭ زەينەتاقىسى ەلدەگى ەڭ تومەنگى جالاقى مولشەرىنەن از. بۇل اقشاعا اي سايىن قاجەت ءزارۋ زاتتىڭ 30 پايىزىن عانا الادى.
ەۋگەنيو سەمينو، زەينەتكەرلەر جونىندەگى ومبۋدسمەن:
- قالت- قۇلت ەتىپ ارەڭ جۇرگەن قارتتارعا وبال. ماردىمسىز زەينەتاقىسى نە دارىگە، نە تاماققا جەتپەيدى. تويىپ اس ىشپەگەن ادامنىڭ سوزىلمالى اۋرۋى اسقىنىپ، جانىن قينايدى.
جىلدىق ينفلياتسيا 105 پايىزعا كوتەرىلدى. ورتالىق بانك بۇل كورسەتكىش 110 پايىزعا جەتەدى دەيدى. جىل باسىنان بەرى ۇلتتىق ۆاليۋتا 20 پايىزعا قۇنسىزدانعان. ۇكىمەت ايىنا 67 دوللار جاردەماقى بەرۋگە شەشىم قابىلداعان. ءبىراق بۇل جۇعىن بولماي تۇر.
حۋان تارتارا، زەينەتكەر:
- سۋپەرماركەتتەگى باعا اپتا سايىن وسەدى. ساۋداگەرلەر ازىق- تۇلىك قۇنىنا 15 پايىزعا دەيىن ۇستەماقى قوسادى. اسىرەسە ىرىمشىك پەن سيىر ەتىنىڭ باعاسى ۋداي. سوڭعى دەرەك بويىنشا، كەدەي تۇرعىنداردىڭ سانى 40 پايىزعا ارتقان. ساراپشىلار الەۋمەتتىك- ەكونوميكالىق جاعدايدىڭ قۇلدىراۋى بيلەۋشى پارتيانى قازان ايىندا وتەتىن پارلامەنت سايلاۋىندا بەدەلىنەن ايىرۋى مۇمكىن دەپ بولجايدى. بۇل داعدارىستىڭ تاعى ءبىر سەبەبى بار. الەم بويىنشا ءىرى كولەمدە استىق ەكسپورتتايتىن ارگەنتينا قازىر ەل تاريحىنداعى ەڭ اۋقىمدى قۋاڭشىلىقتى باستان كەشىرۋدە.
www.24.kz
