وبلىستىق باسقارما باسشىسى جەدەل جاردەم بريگاداسىمەن شاقىرتۋلارعا باردى - ۆيدەو

اتىراۋ. قازاقپارات - اتىراۋ وبلىستىق دەنساۋلىق ساقتاۋ باسقارماسىنىڭ باسشىسى جەدەل جاردەم بريگاداسىنا ىلەسىپ ەكى شاقىرتۋعا باردى، دەپ حابارلايدى قازاقپارات.

«15-ءساۋىر كۇنى كەشكى 23:00-دەن باستاپ جەدەل جاردەم قىزمەتكەرلەرىمەن بىرگە شاقىرتۋعا شىقتىم. العاشقى شاقىرتۋ پاتسيەنتتىڭ ومىرىنە تىكەلەي ءقاۋىپ توندىرەتىن، شۇعىل مەديتسينالىق كومەك تالاپ ەتىلەتىن I كاتەگوريا بولعاندىقتان، اتالعان مەكەنجايعا جەتۋىمىزگە 7 مينۋتتاي ۋاقىت كەتتى. الايدا، ءۇيدىڭ ەسىگى قۇلىپتاۋلى بولىپ، شاقىرتۋ بەرگەن ادام ۇيالى تەلەفونىن كوتەرمەي، جارتى ساعاتقا جۋىق ۋاقىت كۇتتىك. بەلگىلى بولعانداي، سوزىلمالى حولەتسيستيتپەن اۋىراتىن پاتسيەنت ەپيگاستريي ايماعىنا اۋىرسىنۋ سيندرومىمەن شاقىرتۋ تۇسىرگەن. پاتسيەنت الكاگولدى ىشىمدىك پايدالعان، اۋرۋحاناعا بارۋدان باس تارتتى. اۋىرسىنۋدى باساتىن ءدارى ەكتىك»، - دەپ جازدى دەنساۋلىق ساقتاۋ باسقارماسىنىڭ باسشىسى قايسار ابداليەۆ Facebook-تەگى پاراقشاسىندا.

ونىڭ ايتۋىنشا، ەكىنشى شاقىرۋ جۇكتىلىكتىڭ ەرتە مەرزىمىندە قان كەتۋمەن بايلانىستى بولعان. شاقىرتۋعا بارعاندا جۇكتى ايەل ەس-ءتۇسسىز جاتقان. بىردەن العاشقى كومەك كورسەتىپ، اۋرۋحاناعا جەتكىزىلگەن.

«ناۋقاستىڭ دارىگەرلەرگە ۋاقىتىلى تەكسەرىلمەگەنى بەلگىلى بولدى. بۇل - تەك ەكى شاقىرتۋدا ورىن العان وقيعالار. ال جەدەل جاردەم قىزمەتكەرلەرى تاۋلىگىنە 500 گە جۋىق شاقىرتۋعا بارىپ، ءارتۇرلى قيىندىقتى باستان كەشىرەدى. ولار ءۇشىن ادام دەنساۋلىعىن ساقتاۋدا ءار مينۋت ماڭىزدى ەكەنىن ايتقىم كەلەدى. كەي جاعدايلاردا ناۋقاستار تاراپىنان دا كەلەڭسىز وقيعالار ورىن الادى. جۇرتشىلىق جەدەل جاردەم قىزمەتىنە كوڭىلى تولمايتىنىن ايتادى. ءبىراق 103 مەديتسينالىق قىزمەت تۇرىنە نەگىزسىز جۇگىنەتىندەردىڭ قاتارى دا كوپ. سول سەبەپتەن، جەدەل جاردەم قىزمەتكەرلەرىنىڭ جۇمىسىنا تۇسىنىستىكپەن قاراۋعا شاقىرامىن»، - دەدى قايسار ابداليەۆ.

ەندى باسقارما باسشىسى اي سايىن جەدەل جاردەم قىزمەتكەرلەرىمەن بىرگە شاقىرتۋعا شىعۋدى قولعا الماق.

ەسكە سالا كەتەلىك، قايسار ابداليەۆ اتىراۋ وبلىستىق دەنساۋلىق ساقتاۋ باسقارماسىنىڭ باسشىسى بولىپ بيىلعى 6-ساۋىردە تاعايىندالدى.