استانادا ارىستانبەك مۇحامەدي ۇلىنىڭ ىسىنە قاتىستى سوت باستالدى
سوت پروتسەسى بايقوڭىر اۋداندىق №2-سوتىندا قارالىپ جاتىر. ا. مۇحامەدي ۇلى سوت وتىرىسىنا ونلاين رەجيمدە قاتىسىپ وتىر. سەبەبى ەلوردادا قاردىڭ قالىڭ تۇسۋىنە بايلانىستى كۇدىكتى سوت ءوتىپ جاتقان عيماراتقا جەتكىزىلمەدى. سوندىقتان ول سوت وتىرىسىنان كەيىن جەتكىزىلۋى مۇمكىن. اتالعان ءىس سۋديا باعلان ىدىرىسوۆتىڭ قاراۋىمەن ءوتىپ جاتىر.
اتاپ ايتقاندا، جاقىندا بيۋدجەت قاراجاتىن تالان-تاراجعا سالۋ ايىبى تاعىلعان ا. مۇحامەدي ۇلى، ا. نۇرازحان، ا. كوشەنوۆ جانە ا. سادۋاقاسوۆانى ايىپتاۋ بويىنشا قىلمىستىق ءىس بايقوڭىر اۋداندىق №2-سوتىنا ءتۇستى.
ەستەرىڭىزگە سالا كەتەيىك، 2022 -جىلدىڭ 28-مامىرىندا سوت سانكسياسىمەن ۇلتتىق مۋزەي ديرەكتورى ارىستانبەك مۇحامەدي ۇلىنا قاتىستى «كۇزەتپەن ۇستاۋ» بۇلتارتپاۋ شاراسى تاڭدالدى.
تەرگەۋ «التىن ادامنىڭ الەم مۇراجايلارى بويىنشا شەرۋى» حالىقارالىق كورمەسىن وتكىزۋگە، سونداي-اق «قازاقستاننىڭ ۇلتتىق كيەلى نىساندارى مەن مۋزەي قورلارىن جالپىمەملەكەتتىك فوتوگراممەتريالىق 3D-سكانەرلەۋ» جانە «قازاقستان رەسپۋبليكاسىنىڭ ۇلتتىق تسيفرلىق كينوكوللەكتسياسىن تسيفرلاندىرۋ» جوبالارىنا بولىنگەن بيۋدجەت قاراجاتىن ۇرلاۋ فاكتىلەرى بويىنشا جۇرگىزىلدى.
بۇدان باسقا، ا. مۇحامەدي ۇلىنىڭ مادەنيەت جانە سپورت ءمينيسترى لاۋازىمىندا بولعان كەزىندە تۋىستارىنىڭ جانە ۇلەستەس تۇلعالارىنىڭ مەنشىگىنە «سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبى» ر م ق ك، «قازاق ەنتسيكلوپەدياسى» ا ق جانە «قازاق عىلىمي-زەرتتەۋ مادەنيەت ينستيتۋتى» ج ش س زاڭسىز بەرۋگە قاتىستىلىعى تەكسەرىلدى.
تەرگەلگەن قىلمىستىق ىستەر بويىنشا مەملەكەتكە كەلتىرىلگەن زالالدىڭ الدىن الا سوماسى شامامەن 7 ميلليارد تەڭگە دەپ باعالاندى.
