تاراز كوشەسىندە قىزىل كىتاپقا ەنگەن جايرا ءجۇر - ۆيدەو
ۆيدەو بۇگىن تاڭعى ساعات 4-تەردىڭ شاماسىندا تۇسىرىلگەن. قازاقستاننىڭ «قىزىل كىتابىنا» سيرەك كەزدەسەتىن جانە جويىلىپ بارا جاتقان ءتۇر رەتىندە ەنگىزىلگەن جانۋاردىڭ وبلىس ورتالىعىنا قالاي تاپ بولعانى بەلگىسىز.
نەگىزىنەن ەۋرازيا مەن افريكانىڭ سۋبتروپيكتىك جانە تروپيكتىك ايماعىندا تىرشىلىك ەتەتىن، قازاقستاندا تالاس الاتاۋىندا، قاراتاۋدا، ماڭعىستاۋ تۇبەگىندەگى تاۋ جوتالارى مەن بوكتەرلەرىندەگى ورماندار مەن توعايلاردا، وزەن اڭعارلارىندا مەكەندەيتىن جايرانىڭ جامبىل جەرىندە جۇرگەنى تاڭدانارلىق جايت بولدى.
ايتا كەتەيىك، بۇدان بۇرىن جامبىل وبلىسىنداعى «مەركى» قاۋمالىندا قار بارىسى، ءۇندى جايرانى جانە ارقارلاردىڭ سانى ارتىپ كەلە جاتقانىن جازعان بولاتىنبىز.
وندا قاۋمالعا قاراستى ورمان قورى جەرلەرى مەن قىرعىز الاتاۋى اۋماعىندا قورعاۋ جانە كۇزەتۋ جۇمىسى ءوز ناتيجەسىن كورسەتە باستادى. وڭىرىمىزدە بۇرى-سوڭدى بولماعان، «قىزىل كىتاپقا» ەنگەن ارقار، ءۇندى جايرانى، تۇركىستان سىلەۋسىنى، اقباس بۇركىت سەكىلدى ءبىرقاتار اڭ-قۇستار پايدا بولىپ، سانى وسۋدە.
View this post on Instagram
