قازاق جىگىتى امەريكادا قاراقشىلارعا تويتارىس بەرىپ، قارۋلارىن تارتىپ العان - ۆيدەو

استانا. قازاقپارات - الەۋمەتتىك جەلىلەردە ا ق ش-تا جۇرگەن قازاقستاندىق ولجاس قالدىبايەۆقا قاراقشىلىق شابۋىل جاسالعانى، قازاق جىگىتى قىلمىسكەرلەرگە تويتارىس بەرىپ، قارۋلارىن تارتىپ العانى تۋرالى ۆيدەو تاراپ جاتىر، دەپ حابارلايدى قازاقپارات.

بولعان وقيعانى ولجاس قالدىبايەۆ Instagram-داعى پاراقشاسىندا بايانداپ، وقيعا ورنىنان فوتو، ۆيدەولار جۇكتەدى.

ايتۋىنشا، تاپانشا مەن مىلتىق ۇستاعان ءۇش جىگىت سومكەسىن تارتىپ العان. ءبىراق كەيىن ولاردىڭ ءبىرىن قۋىپ ءجۇرىپ ۇستاعان جانە ونى جىبەرمەي وتىرىپ پوليتسەيلەردى كۇتكەن. بارلىعىن ۆيدەوعا ءتۇسىرىپ العان. سول كەزدە قاراقشىنىڭ ەكى دوسى ونى بوساتۋ ءۇشىن قايتا ورالعان. قولدارىندا پيستولەت بولعان. ولار قازاق جىگىتىنە شابۋىل جاساعان. الايدا، و. قالدىبايەۆ قارسىلىق كورسەتىپ، قارۋدى تارتىپ العان. ۇرىلار قاشىپ كەتكەن.

كوپ ۇزاماي پوليتسەيلەر جەتكەن. قاراقشىلاردى ىزدەۋگە 6 پوليتسيا كولىگى مەن تىكۇشاق جۇمىلدىرىلعان.

پوليتسەيلەردىڭ ءبىرىنىڭ سوزىنشە، قازاق جىگىتى قاراقشىلاردان پيستولەت پەن اۆتومات تارتىپ العان، وزدەرىن ۇرىپ- سوققان، ءبىرىنىڭ ءتىسىن سىندىرعان. «مۇندايدى امەريكادا بۇعان دەيىن ەشكىم كورمەگەن»، - دەيدى ەر جىگىتتىڭ باتىلدىعىنا ءتانتى بولعان ءتارتىپ ساقشىسى.