س ق و-دا جازاسىن وتەپ جاتقان ايەلدەر قويان مەن تاۋىق ءوسىرۋدى قولعا الدى - فوتو

پەتروپاۆل. قازاقپارات - سولتۇستىك قازاقستان وبلىسىنداعى ايەلدەر كولونياسىندا جازاسىن وتەۋشىلەر تاۋىق پەن قيار ءوسىرىپ جاتىر، ارنايى كيىم تىگەدى، ال جاقىندا مۇندا ناۋبايحانا جۇمىسىن باستاماق، دەپ حابارلايدى قازاقپارات ءتىلشىسى.

پەتروپاۆلداعى №50 مەكەمە - ايەلدەر كولونياسىندا بيىلدان باستاپ تاۋىق ءوسىرۋ قولعا الىندى. جاڭا كاسىپ بولعاندىقتان الدىمەن 120 جۇمىرتقاعا ارنالعان ينكۋباتور اكەلىنىپ، ناتيجەسى كوڭىلدەن شىققاننان كەيىن ءوندىرىستى كەڭەيتكەن.

«ءبىز قولىمىزدان كەلە مە، جوق پا، قانشاسىنان بالاپان شىعاتىنىن كورمەك بولدىق. كەيىن 580 جۇمىرتقاعا ارنالعان ينكۋباتور الدىق. ودان دا شىعىمدىلىق جوعارى بولىپ، كوپ بالاپان الدىق. ەندى 1,5 مىڭ جۇمىرتقاعا ارنالعان قوندىرعىنى ورناتتىق.

برويلەر جۇمىرتقاسى بەلگىلى ءبىر كۇنى سالىنادى. بۇل وتە جاقسى ەتتى تۇقىم.

تاۋىقتىڭ بۇل ءتۇرىنىڭ جۇمىرتقاسىنان 21 كۇن 8 ساعاتتان كەيىن بالاپان شىعادى.

تاۋىق بالاپاندارىن ارنايى ورىنعا قىزىل ءتۇستى شامنىڭ استىنا ورنالاستىرامىز. مىندەتتى تۇردە انتيبيوتيك، دارۋمەندەر بەرەمىز. ەكى ايدىڭ ىشىندە ولار جەتىلەدى»، - دەيدى وسى فەرمادا جۇمىس ىستەيتىن ولەسيا رۋساك.

ولەسيا رۋساك تۇزەتۋ مەكەمەسىندە 5 جىلعا جۋىق جازاسىن وتەدى. ول مۇندا جاڭا ماماندىق مەڭگەرىپ، جىلىجايدا ەڭبەك ەتتى، ءۇي جانۋارلارىن كۇتتى. جاقىندا تۇزەتۋ مەكەمەسىنەن بوساپ شىقتى.

«ءبىر اپتادان كەيىن وسى ۇيرەنگەن جەرىمە شەبەر رەتىندە جۇمىسقا الىندىم. بۇل ءىس ماعان ۇنايدى. 100 مىڭ تەڭگە ەڭبەكاقىم بار، ءارى جولىمدى تولەيدى. قازىر قىزىممەن، جيەندەرىممەن بىرگە تۇرىپ جاتىرمىن»، - دەيدى ايەل.

تۇزەتۋ مەكەمەسىنىڭ اۋماعىندا ورنالاسقان شاعىن فەرمادا 7 ادام جۇمىس ىستەيدى. بۇل جەردە تاۋىقتان باسقا ءۇي قويانىن وسىرەدى.

«ءۇي قويانىنىڭ سانىن 180-گە جەتكىزگەن ەدىك، قازىر 20 سى عانا قالدى. ويتكەنى جاڭا جىلدىڭ الدىندا تاپسىرىس جوعارى بولدى»، - دەيدى ولەسيا رۋساك.

ال 100 شارشى مەتر اۋماقتى الىپ جاتقان جىلىجايدا بيىل تەك قيار جانە گيدروپوندى جەمازىقتى ءوسىرىپ جاتىر. ودان باسقا ءجۇزىم، ليمون جانە قۇرما اعاشى وسەدى. ونىڭ ءبارىن سوتتالعاندار تۇقىمنان وسىرگەن ەكەن.

قازىر تۇزەتۋ مەكەمەسىندە 215 قىز-كەلىنشەك جازاسىن وتەپ جاتىر. سوتتالعانداردىڭ %98 جۇمىسپەن قامتىلعان.

«مەكەمە اۋماعىندا بۇگىندە 7 جەكە كاسىپكەر جۇمىس ىستەيدى. ولاردىڭ ءبىرى - ءبىزدىڭ قىزمەتكەرلەرگە فورما تىگەدى، ءوز دۇكەندەرى بار، سوندا ساتادى. ەندى ءبىرى مەديتسينا قىزمەتكەرلەرىنىڭ كيىمىن تىگەدى. تاعى ءبىر جەكە كاسىپكەر تاۋىق ءوسىرۋدى قولعا الدى. تاۋىق ەتىمەن، جۇمىرتقامەن اينالىسادى. ال جاقىندا ناۋبايحانا اشىلماق. ول جەرگە ءبىزدىڭ 4 سوتتالعان جۇمىسقا ورنالاسادى. بيزنەس جوسپارلارى دايىن»، - دەيدى پەتروپاۆلداعى № 50 مەكەمە باستىعىنىڭ ورىنباسارى جەڭىس ەلۋبايەۆ.