مىرزاعالي ايتجانوۆ بوكستان الەم چەمپيوناتىنا دايىندىق تۋرالى ايتىپ بەردى
قازاقستان بوكس فەدەراتسياسىنىڭ الەۋمەتتىك جەلىدەگى پاراقشاسىندا تاشكەنتتە وتەتىن الەم چەمپيوناتىنا دايىندىقتىڭ العاشقى وقۋ-جاتتىعۋ جيىنى اياقتالعانى ايتىلعان.
بوكستان قازاقستان ەرلەر قۇراماسى كەلەسى جيىندى 19-ساۋىردە باس باپكەر مىرزاعالي ايتجانوۆتىڭ جەتەكشىلىگىمەن وتكىزەدى.
«الەم چەمپيوناتى الدىنداعى وقۋ-جاتتىعۋدىڭ سوڭعى كەزەڭى ەلىمىزدەگى «الما-تاۋ» بازاسىندا وتەدى. ول جەردە بىرىككەن وقۋ-جاتتىعۋ جيىنى بولادى. اۆستراليا، فيليپپين، ارمەنيا، تاجىكستان ەلدەرىنىڭ سپورتشىلارى بىزبەن بىرگە بىرىككەن جاتتىعۋ جيىنىن وتكىزەدى. ونىڭ بارىسىندا ارنايى شەبەرلىككە، تاكتيكاعا ەرەكشە ءمان بەرەمىز. سول جەردەن 29-ساۋىردە تاشكەنتكە اتتانامىز. 30 ساۋىردە جارىستىڭ جەرەبەسى تارتىلادى. ال 1-14-مامىر ارالىعىنداعى الەم چەمپيوناتىنا بوكستان ۇلتتىق قۇراما كومانداسى قاتىسادى»، - دەدى مىرزاعالي ايتجانوۆ.
ونىڭ ايتۋىنشا، ەلىمىزدەگى وقۋ-جاتتىعۋ جيىنىنىڭ ورتا كەزىندە جارىسقا قاتىساتىن بوكسشىلاردىڭ ءتىزىمى جاريالانادى.
ايتا كەتەيىك، بيىل مىرزاعالي ايتجانوۆ بوكستان قازاقستان ەرلەر قۇراماسىنىڭ باس باپكەرى بولىپ تاعايىندالدى.
30-ءساۋىر مەن 14-مامىر ارالىعىندا وزبەكستاننىڭ تاشكەنت قالاسىندا بوكستان الەم چەمپيوناتى وتەدى.
Посмотреть эту публикацию в Instagram
