ءشومىشباي ساريەۆتىڭ ۇيعىر تىلىندەگى جاڭا كىتابى تانىستىرىلدى - فوتو
سالتاناتتى شاراعا مەملەكەت جانە قوعام قايراتكەرلەرى، اقىن- جازۋشىلار، زيالى قاۋىم وكىلدەرى، قازاق ەستراداسىنىڭ جۇلدىزدارى قاتىستى.
«اعا ومىردەن وتسەدە دە، قالدىرعان مۇراسى ەلىمىزدىڭ ادەبيەتىندە، ءان ونەرىندە، حالىق جادىندا ماڭگى ساقتالادى. اعا جايلى ايتىلار ءسوز كوپ. كەڭەس دۇيسەكەيەۆپەن جازعان «قاراعىم-اي» ءانى ەلىمىزدى الەمگە تانىتىپ، بارشا حالىق قوسىلىپ شىرقايتىن انگە اينالدى. ارتىنا قالدىرعان مۇراسىن ناسيحاتتاۋ - بارشامىزعا پارىز. ۇيعىر تەاترىنىڭ باستاماسىنا العىسىمىزدى بىلدىرەمىز. مەن ءوزىم ءشومىشباي ساريەۆتىڭ باتاسىن العان بالانىڭ ءبىرىمىن. ستۋدەنتتىك شاعىمىزدا ونەرىمىزگە ساتتىلىك تىلەپ، ءوزىنىڭ اق تىلەگىن ارناعان ەدى. جاناشىرلىعى بارشامىزعا ونەگە بولدى»، - دەدى مادەنيەت جانە سپورت ۆيتسە-ءمينيسترى نۇرعيسا داۋەشوۆ.
قازاقستاننىڭ حالىق ءارتىسى روزا رىمبايەۆا اقىن ءشومىشباي ساريەۆ ⅩⅩ جانە XXI عاسىرداعى قازاق پوەزياسىن جوعارى كوتەرگەن تۇلعالاردىڭ ءبىرى ەكەنىن ايتتى.
«بولمىسى بولەك بولاتىن. اقىننىڭ قالامىنان تۋعان ولەڭدەرى حالىق جادىندا ماڭگى ساقتالادى»، - دەدى ر. رىمبايەۆا.
ايتا كەتەيىك، تەاترداعى تانىستىرىلىم اياسىندا ءشومىشباي ناعاشىباي ۇلىنىڭ ءومىرى مەن شىعارماشىلىعىنا ارنالعان كىتاپ كورمەسى ۇيىمداستىرىلدى.
ەسكە سالساق، ەلگە ەڭبەگى سىڭگەن قايراتكەر ش. ساريەۆ 2021 -جىلى اقپان ايىندا دۇنيەدەن وزدى.
2021 -جىلدىڭ كۇزىندە استانادا اقىن، ادەبيەتتانۋشى، عالىم جانە قازاقستانعا ەڭبەگى سىڭگەن قايراتكەر ش. ساريەۆتىڭ «جۇرەگىم - قازاق ەلى» اتتى جاڭا تۋىندىسىنىڭ تۇساۋكەسەرى ءوتتى.
