شەتەلدىك ب ا ق-تاعى قازاقستان: قىتايمەن ۆيزاسىز رەجيم، ازەربايجان پرەزيدەنتىنىڭ ساپارى جانە كاسپيدەگى ىنتىماقتاستىق
قازاقپارات قازاقستان جايلى جازعان الەمدىك ب ا ق شولۋىن نازارىڭىزعا ۇسىنادى.
trend.az: ازەربايجان مەن قازاقستان ءبىرقاتار قۇجاتتارعا قول قويدى
10-ساۋىردە Trend.az حابارلاعانداي، استانادا ازەربايجان پرەزيدەنتى يلحام اليەۆ پەن قازاقستان پرەزيدەنتى قاسىم-جومارت توقايەۆتىڭ كەزدەسۋ قورىتىندىسى بويىنشا ەكىجاقتى قۇجاتتارعا قول قويۋ ءراسىمى ءوتتى.
ەكى ەلدىڭ باسشىلارى قازاقستان مەن ازەربايجاننىڭ جوعارى مەملەكەتارالىق كەڭەسىن قۇرۋ تۋرالى حاتتاماعا، دياسپورا مەن شاعىن جانە ورتا بيزنەستىڭ جۇمىسى، عىلىمي جانە مادەني ىنتىماقتاستىق تۋرالى، سونىمەن بىرگە ق ر پرەزيدەنتى تەلەراديوكەشەنى مەن ازەربايجان مەملەكەتتىك اقپارات اگەنتتىگى اراسىنداعى ىنتىماقتاستىق تۋرالى مەموراندۋمعا قول قويدى.
Caspian News: ازەربايجان مەن قازاقستان «ورتا ءدالىزدىڭ» بارلىق مۇمكىندىگىن پايدالانۋعا كەلىستى
Caspian News باسىلىمىندا ءساۋىردىڭ 12 سى كۇنى جاريالانعان ماقالادا ازەربايجان پرەزيدەنتى يلحام اليەۆتىڭ 10-ساۋىردەگى قازاقستانعا ساپارى كەزىندە ازەربايجان مەن قازاقستاننىڭ «ورتا ءدالىز» دەپ اتالاتىن ترانسكاسپي حالىقارالىق كولىك باعىتىنىڭ بارلىق مۇمكىندىگىن پايدالانۋعا كەلىسكەنى جازىلعان.
«استانادا وتكەن بىرلەسكەن باسپا ءسوز ماجىلىسىندە قازاقستان پرەزيدەنتى قاسىم-جومارت توقايەۆ ورتالىق ازيا ەلىنىڭ كاسپي تەڭىزى جاعالاۋىنداعى كورشىسى ازەربايجانمەن «ورتا ءدالىزدىڭ» الەۋەتىن تولىق كولەمدە پايدالانۋ ماڭىزدى ەكەنىن ايتتى»، - دەلىنگەن ماقالادا.
reuters: قازاقستان ءىرى مۇناي كومپانيالارىن شىعىنعا بايلانىستى اربيتراج سوتىنا بەرمەك
Reuters اگەنتتىگى 11-ساۋىردە قازاقستاننىڭ ەنەرگەتيكا ءمينيسترى الماسادام ساتقاليەۆكە سىلتەمە جاساپ، قازاقستاننىڭ قاشاعان جانە قاراشىعاناق مۇناي كەن ورىندارىن يگەرۋشى كومپانيالارعا قارسى اربيتراجدىق ءىس قوزعاعانىن حابارلادى. مينيستر وپەراتورلارعا قارسى سايكەسىنشە 13 ميلليارد دوللار جانە 3,5 ميلليارد دوللار كولەمىندە سوتقا شاعىم تۇسكەنىن ايتتى.
«مەن بۇل سوت پروتسەستەرى قازاقستان حالقىنىڭ مۇددەسى ءۇشىن قوزعالعانىن عانا ايتا الامىن»، - دەدى الماسادام ساتقاليەۆ سەيسەنبى كۇنى.
تاسس: رەسەي مەن قازاقستاننىڭ جوعارى لاۋازىمدى تۇلعالارى كاسپي تەڭىزى ايماعىنداعى ىنتىماقتاستىقتىڭ ماڭىزىن اتاپ ءوتتى
ءساۋىردىڭ 11 ى كۇنى رەسەيدىڭ تاسس اقپارات اگەنتتىگىنىڭ حابارلاۋىنشا، رەسەي سىرتقى ىستەر ءمينيسترى سەرگەي لاۆروۆ پەن ماسكەۋگە ساپارمەن بارعان قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ كاسپي تەڭىزى ايماعىنداعى كوپجاقتى ىنتىماقتاستىقتىڭ ماڭىزىنا توقتالىپ ءوتتى.
«كاسپي تەڭىزى ايماعىنداعى كوپجاقتى ىنتىماقتاستىقتىڭ ماڭىزدىلىعى اتاپ ءوتىلدى، ول قازىرگى حالىقارالىق جاعدايعا تاۋەلدى بولماۋى كەرەك»، - دەلىنگەن رەسەي س ءى م مالىمدەمەسىندە.
Korea JoongAng daily: كورەيا مەن قازاقستان پايدالى قازبالار مەن ينفراقۇرىلىم سالاسىنداعى ماڭىزدى جوبالار بويىنشا ىنتىماقتاستىقتى كۇشەيتەدى
Korea JoongAng Daily وڭتۇستىك كورەيانىڭ ۇلتتىق كۇندەلىكتى گازەتىنىڭ JoongAng اعىلشىن تىلىندەگى باسىلىمى 14-ساۋىردە كورەيانىڭ ونەركاسىپ مينيسترلىگىنە سىلتەمە جاساپ، كورەيا مەن قازاقستان نەگىزگى پايدالى قازبالار مەن ءىرى ينفراقۇرىلىمدىق جوبالار بويىنشا ەكىجاقتى ىنتىماقتاستىقتى كەڭەيتۋگە كەلىستى دەپ حابارلادى.
بۇل تۋرالى ۋاعدالاستىققا 14-ساۋىردە سەۋلدە كورەيانىڭ ونەركاسىپ ءمينيسترى لي چان يان مەن قازاقستان پرەمەر- ءمينيسترىنىڭ ءبىرىنشى ورىنباسارى رومان سكلياردىڭ كەزدەسۋى بارىسىندا قول جەتكىزىلدى.
تاراپتار قازاقستان مەن كورەيا ءتۇرلى ينفراقۇرىلىمدىق جانە ەنەرگەتيكالىق جوبالاردا، ماسەلەن، شىمكەنت قالاسىنداعى كومبينيرلەنگەن تسيكلدى زاۋىت سالۋدا ىنتىماقتاسىپ، جۇمىس ىستەپ جاتقانىن اتاپ ءوتتى. مينيستر لي كورەيلىك فيرمالاردى قازاقستاننىڭ ەنەرگەتيكا جانە مينەرالدىق سەكتورلارىندا جاڭا كەلىسىمشارت جاسايتىن جاڭا جوبالاردى قاراستىرۋعا شاقىردى.
Peoplە’s daily: قىتاي- ەۋروپا جۇك پويىزى شيان قالاسىنان قازاقستانعا جول تارتتى
ءساۋىردىڭ 11 ى كۇنى قىتايدىڭ People's Daily گازەتى ماتەريالدىق ەمەس مادەني مۇرانى تاسىمالدايتىن قىتاي- ەۋروپا جۇك پويىزى قىتايدىڭ سولتۇستىك- باتىسىنداعى شانشي پروۆينتسياسىنىڭ شيان قالاسىنداعى شيان حالىقارالىق پورتىنان قازاقستانعا جول تارتقانىن حابارلادى.
«سولتۇستىك قازاقستان وبلىسىنداعى جەرگىلىكتى ايەلدەر مەن بالالارعا شيان قالاسىنداعى بالالاردىڭ سالعان سۋرەتتەرى مەن دوستىق سەزىمىن بىلدىرەتىن حاتتارمەن قوسا، ماتەريالدىق ەمەس مادەني مۇرالار، ونىڭ ىشىندە بويالعان ورامالدار، قۋىرشاقتار جانە قاعاز قيىندىلارىنان جاسالعان جۇمىستارى جىبەرىلدى. پويىزدى ىسكە قوسۋ كەزىندە قىتايدا ءبىلىم الىپ جاتقان قازاقستاندىق ستۋدەنتتەرگە ارنالعان ءىس- شارا وتكىزىلىپ، ولارعا قىتايدىڭ ماتەريالدىق ەمەس مادەني مۇرالارى، سونىڭ ىشىندە كەستە، بەتكە ارنالعان ماسكالار، بالشىقتان جاسالعان مۇسىندەر، قاعاز قيىندىلارىنان جاسالعان جۇمىستار تانىستىرىلدى»، - دەلىنگەن ماقالادا.
Jamestown Foundation, Eurasia Daily Monitor: قازاقستان رەسەي مەن قىتايدى بايلانىستىراتىن گاز قۇبىرى جوباسىن ۇسىنىپ وتىر
Eurasia Daily Monitor باسىلىمى 12-ساۋىردە رەسەي مەن قىتايدى قازاقستان اۋماعى ارقىلى بايلانىستىراتىن جاڭا حالىقارالىق گاز قۇبىرىن سالۋ تۋرالى قازاقستاننىڭ ۇسىنىسى تۋرالى حابارلادى.
«جاڭا قۇبىر جوباسى تابيعي گاز رەسۋرستارىن قازاقستاننىڭ شىعىس ايماقتارىنا جەتكىزۋ ءۇشىن قاجەت. جوبا بويىنشا سوڭعى شەشىم 1-مامىرعا دەيىن قابىلدانۋعا ءتيىس. تۇتاستاي العاندا، ۇسىنىلىپ وتىرعان قۇبىر رەسەيلىك گازدى قازاقستاننىڭ شىعىس ايماقتارى ارقىلى قىتايعا جەتكىزۋدىڭ ەڭ جىلدام ءارى قىسقا جولى بولادى دەپ كۇتىلۋدە. الايدا ناقتى مالىمەتتەر ءالى جاريالانعان جوق»، - دەلىنگەن ماقالادا.
moldpres: جاقىندا مولدوۆا- قازاقستان بيزنەس فورۋمى وتەدى
مولدوۆانىڭ Moldpres مەملەكەتتىك اقپارات اگەنتتىگى 11-ساۋىردە جاريالانعان ماقالادا مولدوۆا پرەمەر- ءمينيسترى دورين رەچەان مەن قازاقستاننىڭ مولدوۆاداعى ەلشىسى المات ايداربەكوۆتىڭ كەزدەسۋىندە تالقىلانعان ەكىجاقتى بيزنەس- فورۋمدى ۇيىمداستىرۋ جوسپارى تۋرالى ايتىلعان.
«رەسمي تۇلعالار ەكى مەملەكەت اراسىنداعى قالىپتاسقان قارىم-قاتىناستارعا باعا بەرىپ، ەكونوميكالىق ىنتىماقتاستىق الەۋەتىن پايدالانۋ ماسەلەلەرىن تالقىلادى»، - دەپ جازادى اگەنتتىك.
eurasianet: قىتاي- ورتا ازيا: «بولاتتان جاسالعان تۇيە كەرۋەنى» قايدا بارا جاتىر؟
Eurasianet سايتىندا 11-ساۋىردە قىتايدىڭ قازاقستانداعى ەلشىسى جان سياوعا سىلتەمە جاسالعان ماقالادا ورتالىق ازيا مەن قىتاي اراسىنداعى، ونىڭ ىشىندە كولىك جانە لوگيستيكا سالاسىنداعى ىنتىماقتاستىقتى دامىتۋعا باسا نازار اۋدارىلعان. ماقالادا قازاقستان رەسپۋبليكاسى سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى مۇرات مۇقىشەۆتىڭ قازاقستاننىڭ شانحاي ىنتىماقتاستىق ۇيىمى (ش ى ۇ) بويىنشا ۇلتتىق ۇيلەستىرۋشىسى قىزمەتىنە جۋىردا تاعايىندالعانى، ەلشى جان سياونىڭ قازاقستان رەسپۋبليكاسى يندۋستريا جانە ينفراقۇرىلىمدى دامىتۋ ءمينيسترى مارات قارابايەۆپەن كەزدەسۋى جايلى جازىلعان.
Commonspace.eu: قازاقستان مەن قىتاي ەكىجاقتى ۆيزاسىز رەجيم ەنگىزەدى
Commonspace.eu سايتىندا ءساۋىردىڭ 13 ى كۇنى جاريالانعان ماقالادا قازاقستان مەن قىتايدىڭ ءوز ازاماتتارى ءۇشىن ءوزارا ۆيزاسىز رەجيم ەنگىزۋ جوسپارلارى تۋرالى ايتىلعان.
«سارسەنبى كۇنى قازاقستاننىڭ سىرتقى ىستەر مينيسترلىگى قازاقستان ۇكىمەتى مەن قىتاي ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىمگە قول قويۋ تۋرالى قاۋلى جوباسىن قوعامدىق تالقىلاۋعا شىعاردى»، - دەپ حابارلايدى باسىلىم.
كەلىسىمگە قىتاي مەن قازاقستان سىرتقى ىستەر مينيسترلەرى مامىر ايىندا پرەزيدەنت قاسىم- جومارت توقايەۆتىڭ قىتايعا مەملەكەتتىك ساپارى كەزىندە قول قويادى دەپ كۇتىلۋدە.
نازەركە سۇيىندىك
