كاسپي قۇبىر كونسورتسيۋمىنىڭ جۇمىسى قايتا جانداندى
«كورسەتىلگەن كەزەڭدە مۇناي قۇبىرىنىڭ ءارتۇرلى جۇيەلەرىنە، مۇناي ايداۋ ستانسيالارىنا جانە تەڭىز تەرمينالىنا (مەحانيكالىق- تەحنولوگيالىق جابدىقتار، ەنەرگەتيكالىق جانە ەلەكتر جابدىقتارى، باقىلاۋ- ولشەۋ اسپاپتارى مەن اۆتوماتيكا جۇيەلەرى، باسقارۋ جۇيەلەرى) رەگلامەنتتىك تەحنيكالىق قىزمەت كورسەتۋ، سونداي- اق كونسورتسيۋمنىڭ اعىمداعى جانە كۇردەلى جوبالارى بويىنشا جۇمىستار جۇرگىزىلدى. ول جۇمىستاردى سورعى ستانسيالار مەن مۇناي قۇبىرلارىن توقتاتقاندا عانا ورىنداۋعا بولادى»، - دەپ جازىلعان رەسمي سايتتا.
قۇبىردىڭ قازاقستانداعى بولىگىندە مۇناي ايداۋ توقتاتىلعان كەزەڭدە «تەڭىز» مۇناي ايداۋ ستانساسىندا ءورت پەن گاز انىقتاۋ جۇيەسىن جاڭعىرتۋ جۇمىستارى جۇرگىزىلگەن. سونداي- اق «اتىراۋ» مۇناي ايداۋ ستانساسىندا ەلەكترمەن جابدىقتاۋ جۇيەسىن جاڭعىرتۋعا بايلانىستى جۇمىستار ورىندالدى. قۇبىردىڭ وتكىزۋ قابىلەتى تار تۇستارىن كەڭەيتۋ جوباسىنىڭ اياسىندا ءارقايسىسى 20 مىڭ كۆپمەتر كولەمىندەگى ەكى جاڭا رەزەرۆۋار سالۋ جوباسى قولعا الىنىپ وتىر. بۇل رەزەرۆۋارلاردى 2023 -جىلى ىسكە قوسۋ جوسپارلانعان.
«قۇبىردىڭ جۇمىسىنداعى جوسپارلى ىركىلىستەر جىلىنا بىرنەشە رەت جۇرگىزىلەدى. كاسپي قۇبىر كونسورتسيۋمى مۇناي قۇبىرىنىڭ جۇمىسىن توقتاتۋ تۋرالى مالىمەتتەردى ساراپشىلار مەن قوعامعا الدىن الا حابارلامايدى. بۇل قاۋىپسىزدىك ماقساتىمەن جانە قۇبىردى سىرتتان كەسۋ تاۋەكەلىمەن بايلانىستى»، - دەلىنگەن كونسورتسيۋمنىڭ باسپا ءسوز قىزمەتىنىڭ مالىمەتىندە.
قازىرگى تاڭدا تەڭىز تەرمينالىندا مۇناي جونەلتۋ شتاتتىق رەجيمدە ءجۇرىپ جاتىر.
