رەسەيدى قولداعاندار جاڭا سانكسياعا ىلىكتى
ولار رەسەيگە ۋكرايناداعى قاقتىعىسقا بايلانىستى ەنگىزىلگەن سانكسيالاردى اينالىپ وتۋگە كومەكتەستى دەپ ايىپتالىپ وتىر. قارا تىزىمگە ىلىككەن شەتەلدىك ۇيىمداردىڭ ىشىندە قىتاي، تۇركيا جانە بىرىككەن اراب امىرلىكتەرى مەن وزبەكستاننىڭ كاسىپورىندارى بار، دەپ حابارلايدى «حابار 24».
- ا ق ش پەن ۇلى بريتانيا بىرلەسىپ، رەسەيدى تىكەلەي جانە جاناما قولداعان كومپانيالار مەن تۇلعالارعا قوسىمشا سانكسيا سالدى. ونىڭ ىشىندە رەسەيدىڭ وليگارحتارىنان بولەك، ءبىراز مەملەكەتتىڭ كومپانيالارى بار. مىسالى، قىتايلىق كومپانيا باحمۋتتى باسىپ الماققا شابۋىلداپ جاتقان ۆاگنەر جەكە اسكەري ۇيىمىنا سپۋتنيكتەن تۇسىرىلگەن سۋرەتتەردى بەرىپ كەلگەنى انىقتالعان. ۆەنگرياداعى رەسەيگە تيەسىلى حالىقارالىق ينۆەستيتسيالىق بانكتىڭ 3 جوعارعى لاۋازىمدى قىزمەتكەرى سانكسياعا ءىلىندى. بىلتىر ءبىراز مەملەكەتتەر بۇل بانكتىڭ جۇمىسىن توقتاتقاندا رەسمي بۋداپەشت بەيتاراپ قالعان ەدى. ءتىپتى قولدان كەلگەنشە دەمەۋ كورسەتكەن سياقتى. ۆاشينگتون ماسكەۋگە تىم جاقىنداپ كەتەن ۆەنگرياعا دا ەسكەرتۋ جاسادى.
دەۆيد پرەسسمان، ا ق ش- تىڭ ۆەنگرياداعى ەلشىسى:
- ۆەنگريا جۇرەگىندە كرەملدىڭ كۇماندى بانكى بولۋى جانە وعان قاتىستى جەكە تۇلعالاردىڭ ديپلوماتيالىق پاسپورتتار الۋى ناتو- داعى وداقتاستارىنىڭ قاۋىپسىزدىگى مەن ەگەمەندىگىنە قاۋىپ توندىرەدى. ا ق ش ۆەنگريانىڭ ارەكەتىنە جاۋاپ رەتىندە قارسى شارالار قابىلدايتىنىن ەسكەرتەدى. رەسەي مەن سانكسياعا ىلىككەن رەسەيلىك ازاماتتاردىڭ حالىقارالىق قارجى جۇيەسىن پايدالانۋعا جول بەرمەيمىز.
«روس اتوم» كورپوراتسياسىمەن بايلانىسى بەكەم ءبىرقاتار ادامعا دا سانكسيا سالىندى. اق ءۇيدىڭ پايىمداۋىنشا، رەسەي يادرولىق وتىن ەكسپورتىن دا الەم ەلدەرىنە ساياسي جانە ەكونوميكالىق قىسىم كورسەتۋ ءۇشىن پايدالانىپ كەلەدى. ا ق ش- تىڭ قارا تىزىمىنە بەلگىلى وليگارح الىشەر ۋسمانوۆقا قارايتىن USM حولدينگى دە ىلىكتى. سونىڭ ىشىندە تەمىر رۋداسىن ءوندىرۋشى «مەتاللوينۆەست» پەن تەلەكوممۋنيكاتسيا وپەراتورلارىنىڭ ءبىرى «مەگافون» كومپانياسى بار.
