رەسەيدىڭ قازاقستانمەن شەكاراسىندا ءىرى ءورت تۇتاندى

بارناۋل. قازاقپارات - رەسەيدىڭ التاي ولكەسى ميحايلوۆسك اۋدانىندا تۇتانعان ءىرى وتتى سوندىرۋگە ءورت ءسوندىرۋ پويىزى تارتىلدى.

تەمىرجول كولىگى وقيعا ورنىندا جۇمىس ىستەپ جاتقاندارعا 120 توننا سۋ جەتكىزىپ، ارنايى تەحنيكالاردى سۋمەن قامتاماسىز ەتەدى. بۇل تۋرالى باتىس-ءسىبىر تەمىرجولىنىڭ باسپا ءسوز قىزمەتىنەن ءمالىم ەتتى، دەپ حابارلايدى قازاقپارات ت ا س س-قا سىلتەمە جاساپ.

13-ءساۋىر كۇنى ساعات 13:30-دا كليۋچيەۆسك ورمان شارۋاشىلىعىنىڭ ءورت-باقىلاۋ مۇناراسىنىڭ كەزەكشىسى قازاقستان جاعىنان ءتۇتىندى بايقاعان. بۇل تۋرالى altapress.ru التاي ولكەسىنىڭ تابيعاتتى قورعاۋ مينيسترلىگىنىڭ مالىمەتىنە سىلتەمە جاساپ حابارلادى.

وت قازاقستانمەن شەكارادا جالىنداپ جاتىر. اۆياتسيالىق ورمان كۇزەتىنىڭ اقپاراتىنا سايكەس، جالىن 1 مىڭ گەكتار اۋماقتا وقشاۋلاندىرىلدى. ءورت سوندىرۋشىلەر ونى 800 ادام تۇراتىن باستان اۋىلىنان 9 ك م جەردە وشىرە الدى.

ءتىلسىز جاۋمەن كۇرەسكە 82 مامان، 42 تەحنيكا، سونىڭ ىشىندە تۇكۇشاق، 4 اۆتوسيستەرنا، 24 ءورت ءسوندىرۋ تەحنيكاسى، 8 تراكتور جۇمىلدىرىلعان. جاعدايدى ەكپىندى جەل قيىنداتىپ وتىر.

جالىن ۇيلەرگە جاقىنداعان جاعدايدا كومەك كورسەتۋ ءۇشىن قۇتقارۋشىلار باستان اۋىلىنا جانە تاياۋ ورنالاسقان وزگە دە ەلدى مەكەندەرگە جەتتى. بارلىق حالىق ءورت قاۋپى تۋرالى ەسكەرتىلدى.