زاڭگەر قوماقتى قارجى تاۋىپ العاندا نە ىستەۋ كەرەگىن ايتتى
بۇل تۋرالى Tengri Life زاڭگەر دانيار بايعاباتوۆپەن سويلەستى.
تاۋىپ العان اقشانى وزىمدە قالدىرۋعا بولا ما؟
كوشەدەن اقشا تاۋىپ الىپ، ونىڭ كىمدىكى ەكەنىن بىلمەسەڭىز، مىندەتتى تۇردە پوليتسياعا حابارلاسۋ كەرەك دەيدى مامان.
«زاڭعا سايكەس، بىرەۋ ۇمىتىپ كەتكەن زاتتى تاۋىپ العان سوڭ، ونى وزىڭىزدە قالدىرا المايسىز. ونى يەسىنە قايتارۋ ءۇشىن قولدان كەلگەننىڭ ءبارىن جاساۋ كەرەك، ايتپەسە ءسىز ۇرلاعان بولىپ ەسەپتەلەسىز. جەرگىلىكتى اكىمدىككە دە حابارلاسۋىڭىزعا بولادى، ءبىراق تابىلعانى تۋرالى پوليتسياعا ارىز بەرۋ كەرەك»، - دەيدى ول.
دانيار بايعاباتوۆ پوليتسياعا ارىز جازىلعاننان كەيىن تابىلعان زاتتى انىقتاعان ادام نەمەسە پوليتسەي وزىندە ساقتاي الاتىنىن ايتادى.
«التى ايدان كەيىن بۇل تابىلعان زاتتى ەشكىم تالاپ ەتپەسە جانە جوعالعانى تۋرالى حابارلاماسا، زات اۆتوماتتى تۇردە ونى تاپقان ادامنىڭ مەنشىگىنە وتەدى. ەگەر تاپقان ادام مەنشىك قۇقىعىنان باس تارتسا، وندا ولجا مەملەكەت مەنشىگىنە وتەدى. بۇل ازاماتتىق كودەكستىڭ 245-بابىندا رەتتەلگەن»، - دەپ تولىقتىردى دانيار بايعاباتوۆ.
قانشا سىياقى الامىن؟
سول باپقا سايكەس، جوعالعان زاتتى تاۋىپ قايتارعان ازامات وسى تۇلعادان ونى ساقتاۋعا بايلانىستى شىعىنداردىڭ ورنىن تولتىرۋعا قۇقىلى. تابىلعان زات مەملەكەتكە كەتكەن بولسا، جەرگىلىكتى اتقارۋشى ورگان ساقتاۋعا كەتكەن شىعىندى وتەۋى ءتيىس.
«زاتتى تاۋىپ العان ادامنىڭ دا يەسىنەن زات قۇنىنىڭ وتىز پايىزى كولەمىندە سىياقى الۋعا قۇقىعى بار» - دەپ تۇسىندىرەدى زاڭگەر.
تابىلعان زات ونى جوعالتقان ادام ءۇشىن عانا قۇندى بولسا، وندا مۇمكىن بولاتىن سىياقىنىڭ مولشەرىن تاراپتار تىكەلەي تالقىلايدى.
الايدا، ەگەر زاتتى تاۋىپ العان ادام تابىلعانىن جاريا ەتپەسە نەمەسە ونى جاسىرۋ ءۇشىن باسقا ارەكەتتەر جاساسا، سىياقى الۋ قۇقىعىنان ايىرىلادى.
