نەلىكتەن ىستىق سۋعا شومىلۋعا بولمايدى؟

استانا. قازاقپارات - كەي ادامدارعا ىستىق سۋدا شومىلۋ ۇنايدى، ويتكەنى ول كىردى جاقسى شايىپ، بۇلشىقەتتەردى تەزىرەك بوساڭسىتادى.

سونىمەن قاتار، ىستىق ۆاننا كالوريانى جاعۋدىڭ ءتيىمدى ءادىسى. ءبىراق ىستىق سۋعا تىم ءۇيىر بولماۋ كەرەك. ويتكەنى ىستىق سۋعا ءجيى ءتۇسۋ دەنساۋلىققا كەرى اسەر ەتىپ جاراقاتتارعا ءتىپتى ولىمگە اكەلۋى مۇمكىن. «What If Show» جوباسىنىڭ اۆتورلارى ىستىق ۆاننانىڭ زيانى تۋرالى اقپاراتتى جاريالادى.

ىستىق ۆاننانىڭ پايداسى

ىستىق ۆاننانىڭ كوپتەگەن ارتىقشىعى بار دەپ ەسەپتەلەدى، ولاردىڭ ەڭ باستىسى - فيزيكالىق، ەموتسيونالدىق جانە پسيحيكالىق سترەسستى ازايتۋ. جىلۋ جۇرەكتىڭ جيىرىلۋىن كوبەيتىپ، قان تامىرلارىن كەڭەيتىپ، قان قىسىمىن تومەندەتەدى. بۋىنى اۋىراتىن ادامداردا ىستىق سۋ اۋىرسىنۋدى ازايتادى، ال قانت ديابەتىمەن اۋىراتىن ادامداردا ينسۋلينگە سەزىمتالدىقتى ازداپ ارتتىرادى. ىستىق سۋعا تۇسكەن كەزدە 30 مينۋت جاياۋ جۇرگەندەي كوپ كالوريا جۇمسالادى.

ىستىق ۆاننانىڭ زيانى

ىستىق ۆاننا - دەمالۋدىڭ تاماشا ءتاسىلى، ءبىراق قاشان سۋدان شىعۋ كەرەگىن دە ءبىلۋىڭىز كەرەك.

ىستىق ۆاننانى قابىلداۋدىڭ پايداسى بار، ءبىراق كەيبىر ادامدار ءۇشىن بۇل زيان. مىسالى، قان قىسىمى تومەن، دەنە قىزۋى كوتەرىلگەن، ۆاريكوزدىڭ كەڭەيۋى، ترومبوزى بار ادامدارعا ىستىق ۆانناعا تۇسۋگە بولمايدى. سونداي-اق، ىستىق سۋدا تىم ۇزاق جاتۋ ولىمگە اكەلۋى مۇمكىن.

ىستىق سۋ دەنە تەمپەراتۋراسىنىڭ جوعارىلاۋىن تۋدىرۋى مۇمكىن. ەگەر بۇل ورىن السا، قان قىسىمىنىڭ تومەندەۋىنە بايلانىستى ادامنىڭ جۇرەگى وتە جىلدام سوعىپ، شامادان تىس جۇمىس ىستەي باستايدى. بۇل كۇيدە ادامنىڭ باسى اينالادى، دەنەسى دىرىلدەي باستايدى.

سۋدىڭ تەمپەراتۋراسى قانداي بولۋى كەرەك؟

بىرنەشە دەرەككوز ۆانناداعى سۋدىڭ تەمپەراتۋراسى سەلسي بويىنشا 37 جانە 39 گرادۋس ارالىعىندا بولۋى كەرەك دەپ ايتادى. جالپى، ىستىق سۋعا تۇسۋگە بولادى، ءبىراق جوعارىدا اتالعان قاۋىپتەردى بولدىرماۋ ءۇشىن مەجەنى دە ءبىلۋ كەرەك.

ۆاننادا قانشا مينۋت جاتۋعا بولادى؟

جۋىناتىن بولمەدەگى سۋدىڭ تەمپەراتۋراسى 40 گرادۋس تسەلسيي بولسا، وندا 15 مينۋتتان ارتىق جاتۋعا بولمايدى. ەگەر سۋ 35-38 گرادۋسقا دەيىن قىزسا، 30 مينۋتقا دەيىن ىستىق سۋدا جاتۋعا بولادى.

سۋدىڭ تەمپەراتۋراسى قانداي بولسا دا، ۆاننادا ءبىر ساعاتتان ارتىق شومىلۋ ۇسىنىلمايدى.

قاتتى تەرلەۋگە بايلانىستى اعزانىڭ سۋسىزدانۋىن بولدىرماۋ ءۇشىن ۆانناعا تۇسەر الدىندا ءبىر ستاقان سۋ ىشۋگە بولادى. شومىلۋ الدىندا جانە شومىلۋ كەزىندە ىشىمدىك ىشۋگە بولمايدى.