الماتىدا ناۋقاستىڭ ىشىنەن ەكى كەلىدەن اساتىن ءتۇزىلىم الىندى
ناۋقاستىڭ ايتۋىنشا، ءبىر جىلداي بۇرىن ءىشىنىڭ ۇلكەيە باستاعانىن بايقاعان. ءبىراق، بويىنان ەشقانداي ىڭعايسىزدىق پەن اۋىرسىنۋ سەزبەگەن جانە مەديتسينالىق تەكسەرۋدەن وتپەگەن. كەيىن ءىش قۋىسىندا اۋىسرىنۋلار پايدا بولعان سوڭ، دارىگەرلەردىڭ كومەگىنە جۇگىنگەن.
اۋرۋحانانىڭ مالىمەتىنشە، كومپيۋتەرلىك توموگرافيا ناتيجەسىندە ناۋقاستىڭ ىشىندە ۇلكەن ءتۇزىلىمنىڭ بار ەكەنى انىقتالدى. قاجەتتى تالداۋلار جاسالعان سوڭ، كونسيليۋمدە ناۋقاسقا حيرۋرگيالىق وتا جاساۋ تۋرالى شەشىم قابىلداندى. وتا بارىسىندا سالماعى ەكى كەلىدەن اساتىن ءتۇزىلىمدى الىپ تاستاۋ ءۇشىن اۋرۋحانا حيرۋرگتارىنا ەكى جارىم ساعاتتان استام ۋاقىت كەتتى.
«ءىش قۋىسىنان تىس كەڭىستىكتە ورنالاسقان ءتۇزىلىم ءىش قۋىسىنداعى بۇكىل ورگان، ىشەكتىڭ ءبارىن وڭ جاققا ىعىستىرىپ، ءىشتىڭ تەڭ جارتىسىن الىپ جاتتى. وپەراتسيانىڭ كۇردەلىلىگى ءتۇزىلىمنىڭ ءىش قۋىسىنان تىس كەڭىستىكتە ورنالاسىپ، شاپ ايماعىنا ءوتىپ كەتكەنىندە بولدى. مۇنداي جاعدايدا ءتۇزىلىمدى تۇتاس الىپ شىعارۋ ماڭىزدى ەكەنىن ايتۋ كەرەك. سوندىقتان ءبىز شاپ ايماعىنان قوسىمشا تىلىك جاساپ، سان ارتەرياسىنىڭ جانىنان ساننىڭ جوعارعى ۇشتەن ءبىر بولىگىنە دەيىن وتتىك. ونىڭ ۇستىنە ءتۇزىلىم شەكارالارى اورتاعا جاقىن جاتىپ، سول جاق بۇيرەكتىڭ شەكاراسى جانە نەسەپاعاردىڭ بويىمەن كەتكەن. بۇل وتە قاۋىپتى بولدى. ءتۇزىلىمدى ورگانداردان وتە مۇقيات ءبولىپ الۋ قاجەت بولدى»، - دەدى ق ج ش ك كا وتا جاساۋ ءبولىمىنىڭ مەڭگەرۋشىسى نۇركەن جەلدىبايەۆ.
«وتا جاساۋ كەزىندە ءىش قۋىسىنان الىنعان ءتۇزىلىم 25-30 س م-گە دەيىن ءوسىپ، سالماعى 2,240 ك گ بولعانى انىقتالدى. وپەراتسيا ەكى جارىم ساعاتقا سوزىلىپ، وتا جاساۋ ءبولىمىنىڭ مەڭگەرۋشىسى ن. جەلدىبايەۆ، حيرۋرگتار ب. قاسەنوۆ پەن م. احمەتوۆ، وتالىق مەدبيكە ل. گەيداروۆا جانە انەستەزيولوگ ب. بيجانوۆانىڭ ارقاسىندا وپەراتسيا ءساتتى ءوتتى. وتادان كەيىن 7 كۇن وتكەن سوڭ ناۋقاس ۇيىنە جىبەرىلدى»، - دەپ حابارلادى اۋرۋحانانىڭ باسپا ءسوز قىزمەتى.
وسى ورايدا دارىگەرلەر اعزاداعى ورىن العان كەز كەلگەن وزگەرىستەردى دەر كەزىندە تەكسەرتىپ، دارىگەرگە كورىنۋدىڭ ماڭىزدى ەكەنىن ەسكەرتتى.
