تۇركى مەملەكەتتەرى ۇيىمىنا مۇشە ەلدەر اراسىندا جەڭىلدەتىلگەن كەدەن ءدالىزى قۇرىلماق

استانا. قازاقپارات - تۇركى مەملەكەتتەرى ۇيىمىنا مۇشە ەلدەر اراسىندا جەڭىلدەتىلگەن كەدەن ءدالىزى قۇرىلۋى مۇمكىن. كەلىسىم جوباسى «اشىق» ن ق ا پورتالىندا جاريالاندى، دەپ حابارلايدى قازاقپارات ءتىلشىسى.

«ازەربايجان، قازاقستان، قىرعىزستان، تۇركيا جانە وزبەكستان تۇركى مەملەكەتتەرى ۇيىمىنا مۇشە مەملەكەتتەر اراسىندا وتكىزىلەتىن تاۋارلار مەن كولىك قۇرالدارىنا كەدەندىك باقىلاۋدىڭ تيىمدىلىگىن ارتتىرۋ قاجەتتىگىن تاني وتىرىپ، وڭايلاتىلعان كەدەن ءدالىزىنىڭ دامۋىن جانە ونىڭ قاۋىپسىزدىگىن قامتاماسىز ەتۋ تۋرالى ۋاعدالاستى»، - دەلىنگەن قۇجاتتا.

ءمالىم بولعانداي، اتالعان جوبانى ىسكە اسىرۋ ءۇشىن رەسپۋبليكالىق بيۋدجەتتەن قارجى بولىنبەيدى.

«وڭايلاتىلعان كەدەن ءدالىزىن قۇرۋ تۋرالى كەلىسىمگە 2022 -جىلى 11-قاراشادا سامارقاند قالاسىندا تۇركى مەملەكەتتەرى ۇيىمىنا مۇشە مەملەكەت باسشىلارى قول قويدى. كەلىسىمدى راتيفيكاتسيالاۋ كەدەندىك باقىلاۋ راسىمدەرىن وڭايلاتۋ جانە سىرتقى ەكونوميكالىق قىزمەتكە قاتىسۋشىلار ءۇشىن نەعۇرلىم قولايلى جاعدايلار جاساۋ ناتيجەسى رەتىندە، كەدەندىك باقىلاۋدىڭ تيىمدىلىگىن ارتتىرۋعا جانە مەرزىمىن قىسقارتۋعا، ونىڭ قاۋىپسىزدىگىن قامتاماسىز ەتۋگە جانە تاراپتار مەملەكەتتەرىنىڭ اۋماقتارى اراسىندا وتكىزىلەتىن تاۋارلار مەن كولىك قۇرالدارىنا قاتىستى اقپارات الماسۋدى دامىتۋعا مۇمكىندىك بەرەدى»، - دەپ تۇسىندىرمە بەرىلگەن كەلىسىمگە.

قۇجات 26-ساۋىرگە دەيىن كوپشىلى تالقىلاۋدا بولادى. كەيىن ۇكىمەت ۇسىنىسىمەن ءماجىلىستىڭ قاراۋىنا ەنگىزىلەدى. سودان سوڭ قول قويۋ ءۇشىن مەملەكەت باسشىسىنا جولدانادى.