قازاقستان وركەنيەتتى ەل بولامىن دەسە، عىلىمعا كوڭىل ءبولۋى كەرەك - دۇكەن ءماسىمحان ۇلى

استانا. قازاقپارات - بۇگىن مەملەكەت باسىشىنىڭ توراعالىعىمەن عىلىم جانە تەحنولوگيالار جونىندەگى ۇلتتىق كەڭەستىڭ العاشقى وتىرىسى ءوتتى.

وندا وتاندىق عىلىمداعى وزگەرىستەر مەن وزەكتى ماسەلەلەرى ايتىلدى. وسى ورايدا ەلىمىزدەگى عىلىمدا بولىپ جاتقان جاڭاشىلدىقتار تۋرالى ر. ب. سۇلەيمەنوۆ اتىنداعى شىعىس تانۋ ينستيتۋتىنىڭ ديرەكتورى دۇكەن ءماسىمحان ۇلى ايتىپ بەردى.

«ەلىمىزدە سوڭعى 3-4 جىلدا عىلىمعا ەرەكشە كوڭىل ءبولىنىپ كەلەدى. ونى ايقىن اڭعارۋعا بولادى. بىرىنشىدەن، عىلىمعا بولىنگەن قارجىنىڭ كولەمى كورنەكتى تۇردە ۇلعايدى. مىسالى بۇعان دەيىن زەرتتەۋ ينستيتۋتتارىنىڭ قىزمەتكەرلەرىنىڭ جالاقىسى ماردىمسىز بولسا، كەيىنگى جىلداردا كولەمدى تۇردە ءوستى. عالدىمداردىڭ ماتەريالدىق جاعدايى جاقسارىپ كەلەدى. سونداي-اق عىلىمي جوبالارعا بولىنەتىن قارجىنىڭ كولەمى دە ەسەلەپ ۇلعايۋدا. بۇرىن 5 جىلدا ءبىر رەت عىلىمي جوبالارعا كونكۋرس جاريالانسا، جاس عالىمداردىڭ گرانتتىق باعدارلاماسى جىل سايىن 2-3 رەتتەن كونۋرس جاريالاپ وتىرادى.

زەرتتەۋ ينستيتۋتتارىنىڭ 500 عىلىمي قىزمەتكەرى جىلىنا 1-2 جىل ءوزىنىڭ زەرتتەۋ باعىتى بويىنشا، وزىق ەلدەرگە «بولاشاق» باعدارلاماسىمەن تاعىلىمدامادان ءوتىپ كەلۋگە تولىق مۇمكىندىك الدى.

سونىمەن قاتار جاستاردى عىلىمعا تارتۋ ماقساتىندا ماگيسترانتتار مەن دوكتورانتتاردىڭ دا شاكىرتاقىسى ەسەلەپ ارتىپ جاتىر. جاقىندا پرەزيدەنت جانىنداعى ۇلتتىق عىلىمي كەڭەس قۇرىلدى. ونى بۇرىنعى عىلىم سالاسىنداعى بارماق باستى، كوز قىستىلىقتان ارىلتىپ، ىرگەلى ىزدەنىستەرگە، عالىمدارعا قولداۋ كورسەتۋ ماقساتىندا جۇمىس ىستەيدى دەپ كۇتىلۋدە. ودان بولەك، پرەزيدەنت جارلىعىمەن «ۇلتتىق عىلىم اكادەمياسى» قوعامدىق ۇيىمنان مەملەكەتتىك مەنشىككە قايتا الىندى جانە پرەزيدەنتى كۇنسۇلۋ زاكاريا بولىپ تاعايىندالدى.

مۇنىڭ بارلىعى قازاقستاندا عىلىمىنىڭ جاندانىپ، ناقتى باعىتتاردا جۇمىس ىستەي باستاعانىن كورسەتەدى.

پرەزيدەنتىمىزدىڭ باسشىلىعىمەن جانە قولداۋىمەن سوڭعى جىلدارى عىلىمعا بولىنەتىن بيۋدجەت ارتتى. بۇل وتاندىق عىلىمنىڭ ەڭسە كوتەرۋىنە جانە باعىتتاردى، اۋقىمدى جوبالاردى يگەرۋگە كەڭ جول اشادى. عىلىم قاي ەلدە، قاي زاماندا بولماسىن ول - مەملەكەتتىڭ قوزعاۋشى كۇشى. ەگەر ادامزات XXI عاسىرداعى وركەنيەتتىڭ شىڭىنا جەتكەن تاريحىن قاراساق، ونىڭ بىردەن- ءبىر قاينار كوزى - عىلىمي جاڭالىقتار، عىلىمي زەرتتەۋ جۇمىستارى. قازاقستان وركەنيەتتى، دامىعان ەلدەردىڭ قاتارىندا بولامىن دەسە، عىلىمعا جەتكىلىكتى كوڭىل ءبولۋ قاجەت»، - دەدى دۇكەن ءماسىمحان ۇلى.

turkystan.kz