اسقار جۇمادىلدايەۆ: ينۆەستوردىڭ ىعىنا جىعىلۋدى ازايتۋ كەرەك
بۇل تۋرالى عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ۇلتتىق عىلىم اكادەمياسىنىڭ اكادەميگى اسقار جۇمادىلدايەۆ ايتتى، دەپ حابارلايدى قازاقپارات ءتىلشىسى.
«تاۋەلسىزدىكتىڭ 4 قىرى بار. ولار - ساياسي تاۋەلسىزدىك، ەكونوميكالىق تاۋەلسىزدىك، اسكەري تاۋەلسىزدىك جانە تەحنولوگيالىق تاۋەلسىزدىك. وتكەن عاسىردا مەملەكەتارالىق تەكە- تىرەستەر توركىنى يدەولوگيا سالاسىندا جاتتى. بۇگىن تەكە-تىرەس تەحنولوگيا سالاسىندا جاتىر. مەنى قازاقتىڭ تەحنولوگيالىق تاۋەلسىزدىگى مازالايدى. وسى كۇنگى ءبىزدىڭ ءوندىرىس ورىندارىنىڭ ءبارى، اسىرەسە جەر قويناۋىنان كەن شىعاراتىن ورىنداردىڭ ءبارى شەتەلدىك ينۆەستورلارعا بەرىلدى. بۇل نەگىزىنەن دۇرىس قادام بولدى. ءبىراق، بۇگىندە زامان وزگەردى، مەملەكەت وزگەردى. دەمەك، ءبىز وسى ينۆەستورلارعا تالاپتى زامان تالابىنا ساي بەرۋىمىز قاجەت. ينۆەستوردىڭ ىعىنا جىعىلۋدى ازايتۋ كەرەك. مەنىڭ ويىمشا، ولارعا ءۇش شارت قويۋ كەرەك. ءبىرىنشى - سالىق، ەكىنشى - ەكولوگيا، ءۇشىنشى ەڭ باستىسى - جەرگىلىك مامانداردى، جەرگىلىكتى عىلىمدى وندىرىسكە پايدالانۋ ماسەلەسى»، - دەدى ول.
عالىم جەر قويناۋىن پايدالانۋشىلار تابىسىنىڭ 1 پايىزىن وتاندىق عىلىمدى دامىتۋعا جۇمساۋ ءىس- شاراسى جالعاسا بەرۋى تيىستىگىن باسا ايتتى.
«بۇل قاراجاتتى تەحنولوگيالىق تاۋەلسىزدىكتى قۋاتتايتىن جۇمىستارعا، عىلىم مەن قوعام بايلانىسىن نىعايتاتىن جۇمىستارعا، عىلىمي ينستيتۋتتارعا جاڭا عيمارات سالۋعا جانە زاماناۋي زەرتحانا سالۋعا، سونىمەن قاتار ۋنيۆەرسيتەت وقۋلىقتارىن قازاق تىلىندە شىعارۋعا جۇمساۋ كەرەك. وسى جۇمىستى دۇرىس ىستەتىن بولساق، جالپى ىشكى ءونىمنىڭ كەمىندە جارتى پايىزىنا جەتۋگە بولادى»، - دەدى عالىم.
اسقار جۇمادىلدايەۆ ۇلتتىق عىلىم اكادەمياسىنىڭ جارعىسىنا «اكادەميا قازاق ءتىلىن عىلىم تىلىنە اينالدىرۋ ماقساتىندا جۇمىس ىستەيدى» دەگەن ءسوزدى قوسىپ قويۋ كەرەكتىگىن باسا ايتتى.
«قولىنان كەلسە ىستەسىن، ىستەي الماسا قويسىن. ءبىراق، انا جەردە تۇرسىن، مىندەتى ەكەنىن ءبىلسىن»، - دەدى ول.
