ءماجىلىس جانىنان قوعامدىق پالاتا نە ءۇشىن قۇرىلادى - ايدوس سارىم ءتۇسىندىردى
بۇل تۋرالى دەپۋتات ايدوس سارىم ق ر پارلامەنتىندەگى Jibek Joly تەلەارناسىنىڭ موبيلدى ستۋدياسىندا ءتۇسىندىردى، دەپ حابارلايدى قازاقپارات ءتىلشىسى.
ءماجىلىس دەپۋتاتىنىڭ ايتۋىنشا، قوعامدىق پالاتا قۇرۋ - كەڭ تارالعان الەمدىك تاجىريبە.
«كوپتەگەن پارلامەنتتەردە زاڭ شىعارۋشى ورگاننىڭ جۇمىس ساپاسىن جاقسارتاتىن مامانداردى، ساراپشىلاردى، الەۋمەتتانۋشىلاردى، ساياساتتانۋشىلاردى، ەكونوميستەردى جانە باسقا مامانداردى زاڭ شىعارۋ جۇمىسىنا تارتۋعا مۇمكىندىك بەرەتىن وسىنداي ساراپتامالىق الاڭدار بار. ەكىنشى جاعىنان، ءبىزدىڭ مىندەتىمىز - ءوز جۇمىسىمىزدى ادامدارعا تۇسىنىكتى ەتۋ، زاڭنىڭ قالاي ازىرلەنەتىنىن ءتۇسىندىرۋ، ساراپشىلار وسى ءۇشىن قاجەت. ءماجىلىس وسى نەمەسە باسقا زاڭدى تالقىلاۋعا كىرىسپەي تۇرىپ، ساراپشىلاردى تارتىپ، تىڭداعان دۇرىس دەپ سانايمىز. ءبىز ءتىپتى زاڭدى الدىن الا وقۋ فورماتىن ۇسىنامىز. ياعني، قوعامنىڭ بۇل زاڭدى قابىلدامايتىنىن كورسەك، ءماجىلىس مۇنداي زاڭ جوباسىن قاراماي-اق، بىردەن قايتارعانى دۇرىس»، - دەپ ءتۇسىندىردى دەپۋتات ايدوس سارىم.
ونىڭ ايتۋىنشا، ۇلكەن ساراپشىلار پۋلىن الدىن-الا قۇرعان دۇرىس، ولار بارىنەن حاباردار جانە ساراپتاما ساپاسىن ارتتىرادى.
«جۇمىس توبى باستالماي-اق، بەلگىلى ءبىر دايىندىق پايدا بولادى. بۇل تاقىرىپتان حابارى بار، ءوز ۇستانىمىن بىلدىرەتىن ادامدار بولادى. ءبىز ءتىپتى قوعامدىق پالاتانىڭ ءاربىر مۇشەسى ماجىلىسكە كىرە الاتىنداي، كەز كەلگەن ۋاقىتتا كەلىپ، دەپۋتاتتارمەن سويلەسە الاتىنداي، جۇمىس توپتارىنا قاتىسا الاتىنداي مىندەت قويامىز. ەكىنشىدەن، بەلگىلى ءبىر الەۋمەتتانۋشى نەمەسە ەكونوميست ۇسىنىس جاساي الادى، جاقسى ۇسىنىستاردى دەپۋتاتتاردىڭ اتىنان سالىستىرمالى كەستەلەرگە قوسامىز، ءبىراق جاقشادا بۇل قوعامدىق پالاتانىڭ ۇسىنىسى دەپ كورسەتەمىز. وسىلايشا، ساراپشىلاردىڭ زاڭنامالىق جۇمىسقا قاتىسۋعا ىنتاسى بولعانىن قالايمىز»، - دەپ ءتۇسىندىردى ماجىلىسمەن.
ايجان سەرىكجان قىزى
