ەلىمىزدە تەرمينال ويىندارى مەن لوتەرەياعا تىيىم سالۋ ۇسىنىلدى

استانا. قازاقپارات - ءماجىلىس دەپۋتاتى جاناربەك ءاشىمجان ەلىمىزدەگى قۇمار ويىندار جانە ءباس تىگۋ ماسەلەسىن ەرەكشە نازارعا الىپ، قاتاڭ شارالار قابىلداۋدى ۇسىندى، دەپ حابارلايدى قازاقپارات ءتىلشىسى.

«كازينولاردى قاقساپ ءجۇرىپ قاپشاعايعا، شۋلاپ ءجۇرىپ شۋچينسكىگە كوشىرگەنمەن، ماسەلە ءوز شەشىمىن تولىق تاپپادى. ورىمدەي جاستاردى ءتۇرلى ونلاين ينتەرنەت-كازينولار مەن تەرمينالدارعا تەلمىرتىپ قويدى. ناتيجەسىندە، قۇمار ويىنعا شاتىلعاندار ادام ايتسا سەنگىسىز اۋىر قىلمىستارعا بارىپ، قاتىگەزدىك بەلەڭ الىپ بارادى»، - دەدى جاناربەك ءاشىمجان ءماجىلىستىڭ جالپى وتىرىسىندا پرەمەر-ءمينيستردىڭ ورىنباسارى التاي كولگىنوۆكە ساۋال جولداي وتىرىپ.

ونىڭ ايتۋىنشا، قۇمار ويىنعا اۋەستەردىڭ كازينو مەن بۋكمەكەرلىك كومپانيالارعا جۇمسايتىن قاراجات كولەمى جاعا ۇستاتادى.

«وتكەن جىلى قۇمار ويىنداردى ۇيىمداستىرۋ جانە ءباس تىگۋ بويىنشا قىزمەتتەر كولەمى 553,6 ميلليارد تەڭگەنى قۇراعان. بۇل 2021 -جىلمەن سالىستىرعاندا 52 ميلليارد تەڭگەگە، ال 2020 -جىلمەن سالىستىرعاندا 6,2 ەسەگە (89,7 ميلليارد تەڭگە) ارتقان. قۇمار ويىنداردى ۇيىمداستىرۋ جانە ءباس تىگۋ - قىزمەت كورسەتۋ كولەمى بويىنشا جىلجىمايتىن مۇلىكتى راسىمدەۋدەن، (2,6 ەسە)، ساۋلەت، ينجەنەرلىك ىزدەنىستەر، تەحنيكالىق سىناقتار جانە تالداۋ سالاسىنداعى قىزمەتتەن (1,7 ەسە)، كومپيۋتەرلىك باعدارلامالاۋ مەن كونسۋلتاتسيالىق قىزمەتتەردەن (1,4 ەسە) كەيىنگى ورىندا تۇر»، - دەيدى ول.

حالىق قالاۋلىسى ءسوزىن قورىتىندىلاي كەلە اتالعان ماسەلەنى شەشۋ بويىنشا كەلەسى ۇسىنىستاردى ءبىلدىردى:

ءبىرىنشى، بۋكمەكەرلىك كەڭسەلەرگە بانكروت دەپ تانىلعان تۇلعالاردان جانە قولدانىستاعى نەسيە بويىنشا 3-ايدان استام ۋاقىتتان بەرى تولەم جاساي الماعان تۇلعالاردان ونلاين جانە وفلاين ءباس تىگۋدى قابىلداۋعا قاتاڭ تىيىم سالۋ كەرەك.

ەكىنشى، قارجى پيراميدالارىن، ونلاين-كازينولاردى جانە باسقا دا قاۋىپتى قۇمار ويىنداردى جارنامالاۋعا تولىق تىيىم سالۋ تۋرالى قولدانىستاعى زاڭناماعا ءتيىستى وزگەرىستەر ەنگىزۋ كەرەك.

ءۇشىنشى، ەلدە تىيىم سالىنعان، ءبىراق سوعان قاراماستان ينتەرنەتتە كەزدەسەتىن ەلەكتروندىق كازينولاردىڭ جارنامالىق قىزمەتىن باقىلاۋدى كۇشەيتۋ قاجەت.

ءتورتىنشى، سۋپەرماركەتتەر مەن قوعامدىق ورىنداردا سامساپ تۇرعان «Lotomatic» سەكىلدى ءارتۇرلى لوتەرەيا تەرمينالدارىن ورناتۋعا جانە لوتەرەيا بيلەتتەرىن تاراتۋعا قاتاڭ تىيىم سالۋ كەرەك.

بەسىنشى، جەتەكشى تەلە-راديو ارنالار مەن ينتەرنەت-پورتالداردا قۇمار ويىندى ناسيحاتتايتىن جارنامانىڭ بارلىعىنا سىيىم سالۋ كەرەك.