زاڭ جوباسى قازاق تىلىندە تالقىلانىپ، قابىلدانۋى كەرەك - ءماجىلىس دەپۋتاتى

استانا. قازاقپارات - بۇگىن ءماجىلىستىڭ جالپى وتىرىسىندا دەپۋتات ءۇنزيلا شاپاق زاڭ جوبالارىنىڭ ورىس تىلىندە ازىرلەنىپ، قازاق تىلىنە اۋدارىلاتىنىن سىنعا الدى.

زاڭ جوبالارى ءبىرىنشى كەزەكتە مەملەكەتتىك تىلدە ازىرلەنۋى ءتيىس، دەپ حابارلايدى قازاقپارات ءتىلشىسى.

«تاۋەلسىزدىك العاننان بەرى ەلىمىزدە 3589 زاڭ قابىلداندى. 30 جىلدىڭ ىشىندە قازاق ءتىلى مەملەكەتتىك ءتىل بولعانىمەن، زاتى مەملەكەتتىك بولا المادى. زاڭ جوباسى ورىس تىلىندە ازىرلەنىپ، قازاق تىلىنە اۋدارىلاتىنى جاسىرىن ەمەس. وسى كۇنگە دەيىن قازاق تىلىندە تەك ەكى زاڭ جوباسى ازىرلەنىپ، قابىلدانعان. اتاپ ايتساق، تىلدەر تۋرالى، كوشى-قون تۋرالى زاڭدار عانا. زاڭنىڭ قازاق تىلىندەگى ماتىنىنە قاتىستى سىن-پىكىرلەر حالىق اراسىندا وتە كوپ. سونىڭ ءبىرى زاڭ تەرمينى بىرىزدىلىگىنىڭ ساقتالماۋى. مەملەكەتتىك ءتىلدىڭ اياسىنداعى كەشەندى پروبلەمالار قازاقستاندىق قۇقىق جۇيەسى كەڭىستىگىندە ءبىر-بىرىمەن ساباقتاسىپ، ۇشتاسىپ سونىڭ سالدارىنان تۇيتكىلدى ماسەلەلەر بار. قازاق جانە ورىس تىلدەرى قۇرىلىمى تۇرعىسىنان ءارتۇرلى تىلدىك توپتارعا جاتادى. زاڭ شىعارۋ پروتسەسىندە وسى ەرەكشەلىكتەر ەسكەرىلمەسە، ماتىندەردىڭ ماعىنالارى بۇرمالانىپ، ءمانى وزگەرەدى. بۇل جوعارىدا اتالعان سوزبە-ءسوز نەمەسە كالكا اۋدارمانىڭ اسەرى. بۇنداي كەمشىلىككە جول بەرۋگە استە بولمايدى»، - دەدى ءۇ. شاپاق ۇكىمەت باسشىسىنىڭ ورىنباسارى التاي كولگىنوۆتىڭ اتىنا جولداعان ساۋالىندا.

وسى ورايدا ول ءبىرىنشى كەزەكتە زاڭ جوباسى قازاق تىلىندە تالقىلانىپ، قابىلدانۋى كەرەك ەكەنىن ايتتى.

«قازاق تىلىندەگى تەرمينقوردى قالىپتاستىرۋدا ورىن الىپ جاتقان كەمشىلىكتەردى ۋاقتىلى تۇزەتىپ، تەرمين شىعارماشىلىعىن ۇزدىكسىز دامىتىپ، جەتىلدىرىپ، تەرمينولوگيالىق جۇمىستاردى ءبىر ورتالىقتان ۇيلەستىرىپ، كاسىپتىك دەڭگەيدە جۇرگىزگەندە عانا جۇيەلەنگەن ۇلتتىق تەرمينولوگيالىق قور قالىپتاساتىنى اقيقات. بۇگىندە قازاق ءتىلى تەرميندەرىنىڭ ءبىرىڭعاي ەلەكتروندىق بازاسىندا 380 مىڭنان اسا تەرمين ورنالاستىرىلعان بولسا، ونىڭ ىشىندە زاڭتانۋ سالاسىندا 11139 تەرمين بەكىتىلگەن. سول تەرميندەردىڭ ءوزى ءجيى وزگەرىسكە ۇشىرايدى»، - دەدى دەپۋتات.