ارنايى ءبىلىمسىز اسپاز بولۋ قيىن - ەڭبەك ادامى

استانا. قازاقپارات - قىسقا ولشەممەن الساق، ادامنىڭ كوڭىل كۇيى، ۇلكەن ولشەممەن الساق، دەنساۋلىعى نە ءىشىپ، نە جەگەنىنە بايلانىستى.

وسى تۇرعىدان قاراعاندا اسپاز دەيتىن ەڭبەك ادامدارىنىڭ قوعام ومىرىندەگى ماڭىزى ەرەكشە. ەل استاناسىنداعى «قارلىعاش» بالاباقشاسىنىڭ باس اسپازى ليليا گەرامەن تانىسۋىمىز وسى ويدى سانامىزعا بەكىتە تۇسكەندەي بولدى.

ليليا گەرا - شەشە جاعىنان قۋعاندا اسپازدار اۋلەتىنىڭ ءۇشىنشى بۋىنى.

«قانداي ماماندىق تاڭدايتىنىما باس قاتىرماپپىن دا. اجەم اسپاز بولعان انام دا اسپاز. مەن سولاردىڭ ىزىمەن كەلە جاتىرمىن. اس ازىرلەۋگە دەگەن ىنتىزارلىقتى بويىما انام دارىتتى. ۇيىمىزدەن قوناق ارىلمايتىن. سوندىقتان ۋاقىتىمىزدىڭ كوبى تاماق ىستەۋگە كەتەتىن. تاماق پىسىرۋگە سولايشا اۋەستەندىم»، - دەپ باستادى ول اڭگىمەسىن.

53 جاستاعى اسپاز ءومىرىنىڭ 37 جىلىن كاسىبي اسپاز رەتىندە وتكەرىپتى. ۋچيليشەنى بىتىرگەن بويدا «كازاحسەلماش» زاۋىتىنىڭ جۇمىسشىلارىن اسپەن قامدايدى. ودان كەيىنگى اسپازدىق مانسابى نەگىزىنەن بالاباقشالاردا وتكەن. اراسىندا بەس جىل مەيرامحانادا اسپاز بولعان كەزى بار.

2011 -جىلدان بەرى «قارلىعاش» بالاباقشاسىندا تابان اۋدارماي ەڭبەك ەتىپ كەلەدى.

«بالالار ديەتا بويىنشا تاماقتانۋى كەرەك. سوندىقتان قانت پەن تۇزدى مەيلىنشە از قوسامىز. كوبىنەسە بۋعا پىسىرەمىز، ويتكەنى بالانىڭ تاماعى اعزاسىنا ەشبىر زيان كەلتىرمەۋى كەرەك. اسپاز رەتىندە بالانىڭ اس ءمازىرى ماۋسىمعا بايلانىستى تۇرلەنىپ وتىرۋ كەرەك دەپ ەسەپتەيمىن. بىزدە ءمازىردى مەديتسينا مامانى ماقۇلداپ وتىرادى. تاماقتىڭ قۇنارى مىندەتتى تۇردە ەسەپكە الىنادى»، - دەيدى باس اسپاز.

اسپازدار ءمازىردى تىڭ تاعامدارمەن جاڭارتىپ وتىرۋعا تىرىسادى.

«جاڭا ءبىر اس ويلاپ تاپساق، بالالارعا قانشالىقتى ۇنايتىنىن تەكسەرەمىز. بالالار ءسۇيىپ جەمەسە، مازىردەن الىپ تاستاپ وتىرامىز. ءتۇشپارا مەن ءمانتى تۇيەمىز، ەت اسامىز. ويتكەنى بالالار ءسۇيىپ جەيدى. جالپى بالا بىتكەن ءۇيدىڭ تاماعىن ىزدەپ تۇرادى»، - دەيدى ليليا گەرا.

ونىڭ پايىمىنشا، اسپاز تاماق ىستەۋگە شابىتپەن كىرىسۋى كەرەك.

«بالالاردىڭ تاماق ۇناعاندا قول بۇلعاپ، باس بارماقتارىن كورسەتكەنىنىڭ ءوزى قۋانىش سىيلايدى. ءبىر ۇل بولدى، اسحانادان تاماق تاۋسىلعانشا شىقپايتىن. ءتۇرى ءالى ەسىمدە. بىزبەن قاتتى دوس بولىپ كەتكەن ەدى. ءبىزدىڭ جۇمىسىمىزدى نەگىزگى باعالاۋشىلار - وسى بالالار»، - دەيدى اسپاز.

كانىگى مامان اسپاز بولۋ ءۇشىن ارنايى ءبىلىمنىڭ قاجەتى جوق دەگەن تۇسىنىكتىڭ جاڭساق ەكەنىن ايتادى.

«كەز كەلگەن ماماندىق ارنايى ءبىلىمدى قاجەت ەتەدى عوي. اسپازدىق تا سونداي. اۋەلى اس ازىرلەيتىن ونىمدەر تۋرالى ەڭ قاراپايىم دۇنيەلەردى ءبىلۋىڭ كەرەك. ارينە، ءقازىر ينتەرنەتتەن قاراپ، كەز كەلگەن تاماقتى ىستەۋگە بولادى. ءبىراق ونىڭ ءبارى فوتو مەن ۆيدەوداعىداي بولىپ شىعا بەرمەيدى. اسپازدىقتىڭ ءوز قۇپيالارى بار. ونى وقىماي مەڭگەرۋ قيىن. ءار اسپازدىڭ تاماق ىستەۋ ءتاسىلى ءارقالاي. ءبىزدىڭ جاعدايدا بالالاردى جان- تانىڭمەن جاقسى كورۋ كەرەك. سۇيىسپەنشىلىكپەن ىستەگەن تاماق جۇعىمدى بولادى»، - دەيدى ليليا گەرا.

ەسىمجان ناقتىباي