ءجۇسىپ جۇماعۇلوۆ استانادا جاڭادان قۇرىلعان نۇرا اۋدانىنىڭ اكىمى بولىپ تاعايىندالدى

استانا. قازاقپارات - پرەزيدەنت اكىمشىلىگى جانە قالالىق ءماسليحات دەپۋتاتتارىنىڭ كەلىسىمىمەن استانا قالاسى نۇرا اۋدانىنىڭ اكىمى لاۋازىمىنا بۇعان دەيىن سارىارقا اۋدانىنىڭ اكىمى بولعان ءجۇسىپ جۇماعۇلوۆ تاعايىندالدى، دەپ حابارلايدى قازاقپارات ءتىلشىسى.

ءجۇسىپ جۇماعۇلوۆ - پرەزيدەنتتىك جاستار كادر رەزەرۆىنىڭ مۇشەسى. ەڭبەك جولىن ەلوردانىڭ ينۆەستيتسيالار جانە دامۋ باسقارماسىنىڭ مامانى لاۋازىمىنان باستاعان. 2016 -جىلدان 2019 -جىلعا دەيىن «ءدىن پروبلەمالارىن زەرتتەۋ ورتالىعى» ك م م باسشىسىنىڭ ورىنباسارى، ەلوردانىڭ قوعامدىق دامۋ ىستەرى باسقارماسى باسشىسىنىڭ ورىنباسارى قىزمەتتەرىن اتقاردى. 2020-جىلدان باستاپ ەلوردا اكىمى اپپاراتى باسشىسىنىڭ ورىنباسارى بولىپ ەڭبەك ەتتى. 2022 -جىلدىڭ اقپان ايىنان باستاپ سارىارقا اۋدانىنىڭ اكىمى قىزمەتىن اتقاردى.

«وزدەرىڭىز جاقسى بىلەسىزدەر، سارى ارقا اۋدانىندا «نۇر بەسىك» شاعىن اۋدانىنىڭ ۇلكەن پروبلەماسى بولدى. بۇل ماسەلە 16 جىل بويى شەشىمىن تاپپاي جۇرگەن. ءجۇسىپ راحات ۇلى وسى ماسەلەنىڭ شەشۋ جولدارىن تاۋىپ، وتكەن اپتادا سوتپەن جانە پروكۋراتۋرامەن كەلىسىپ، جۇمىستاردى باستاپ كەتتى. ونىڭ دا ءوز الگوريتمى بار، تامىز ايىنىڭ سوڭىنا دەيىن بۇل پروبلەما شەشىلەدى دەپ جوسپارلاپ وتىرمىز. اۋدان ءۇشىن بۇل ەڭ جاقسى شەشىم بولدى، سوندىقتان مۇنى ءجۇسىپتىڭ ۇلكەن جەڭىسى دەپ سانايمىن. جاڭا نۇرا اۋدانىندا دا ماسەلەلەر از ەمەس، ونىڭ ىشىندە «ۇركەر» تۇرعىن الابى بار. بارلىق ماسەلەنى دەپۋتاتتىق كورپۋسپەن تىعىز جۇمىس ىستەپ شەشۋگە بولادى دەپ ويلايمىن»، - دەدى ەلوردا اكىمى جەڭىس قاسىمبەك بۇگىنگى ءماسليحات وتىرىسىندا.

استانا قالاسىنىڭ ءماسليحاتى اكىمدى تاعايىنداۋعا كەلىسىمىن بەردى.