ماڭعىستاۋدا جارىلايىن دەپ تۇرعان «جارا» كوپ - ەدىل جاڭبىرشين
بۇل تۋرالى ءماجىلىستىڭ جالپى وتىرىسىندا دەپۋتات ەدىل جاڭبىرشين ءمالىم ەتتى، دەپ حابارلايدى قازاقپارات ءتىلشىسى.
«كەيىنگى جىلدارى ەلىمىزدىڭ باتىس وڭىرلەرىندە مۇناي-گاز كاسىپورىندارىندا قىزمەت كورسەتەتىن سەرۆيستىك كومپانيالار جۇمىسشىلارىنىڭ ەرەۋىلدەرى جيىلەپ كەتتى. كۇنى كەشە ءبىر توپ ماڭعىستاۋلىق مۇنايشىلار وڭىردە ءوز ماسەلەلەلەرى شەشىلمەگەسىن استاناعا كەلدى. وتكەن جىلى دا وسىنداي وقيعا باس قالامىزدا ورىن العان بولاتىن. سونىمەن قاتار، كەشەگى سايلاۋالدى ۇگىت- ناسيحات كەزىندە بىرنەشە سەرۆيستىك كومپانيار «سامۇرىق- قازىنا» قورىنىڭ ەرەجەلەرىنىڭ تالاپتارىنىڭ ەسكىرگەنىن جانە قازىرگى جاعدايعا سايكەس كەلمەيتىنىن ايتىپ، شاعىمدانعان بولاتىن. ماسەلەن، ماڭعىستاۋدا ءبىر جاۋاپكەرشىلىگى شەكتەۋلى سەرىكتەستىك جۇمىسسىزدىق بەلەڭ العان جاڭاوزەن قالاسىندا، جەتىباي كەنتىندە، مۇنايلى اۋدانىندا سەحتار اشىپ، نەگىزىنەن جەرگىلىكتى ايەل ازاماتتاردى تۇراقتى جۇمىسپەن قامتىپ، مۇناي كومپانيالارىنا ارنايى كيىم تىگۋدى قولعا العان بولاتىن. الايدا، جىل سايىن وتەتىن تەندەرلەردىڭ كەسىرىنەن كونتراكت الا الماي قالسا نەمەسە باعا دەمپينگىسىنەن شارت سوماسى ەداۋىر تومەندەسە، % 90 جۇمىسشى جۇمىسسىز قالايىن دەپ وتىر. مۇنداي مىسالداردى كوپتەپ كەلتىرۋگە بولادى»، - دەدى ە. جاڭبىرشين ۇكىمەت باسشىسى ءاليحان سمايىلوۆتىڭ اتىنا جولداعان ساۋالىندا.
وسى ورايدا ول ءماجىلىستىڭ جەتىنشى شاقىرىلىمىندا ماڭعىستاۋداعى جۇمىسسىزدىققا جانە ەڭبەك داۋلارىنا قاتىستى ماسەلەلەر كوتەرىلگەنىن ەسكە سالدى.
«ءبىراق، ۇكىمەت، «سامۇرىق- قازىنا»، «قازمۇنايگاز» جانە جەرگىلىكتى اتقارۋشى بيلىك تاراپىنان جۇيەلى جۇمىستار، ءتيىستى ناتيجە بولمادى. ال، ماڭعىستاۋدا جارىلايىن دەپ تۇرعان «جارا» كوپ. ولاردى كەشەندى تۇردە «ەمدەۋمەن» اينالىسپاسا، داۋ- داماي ءارى قاراي جالعاسىپ، ۋشىعا بەرەدى. ۇكىمەت كوميسسياسىن قۇرۋ جونىندە سىزگە حاتتا جولدادىق. وعان ءالى جاۋاپ بەرمەدىڭىز. قاشانعى كوزدى جۇمىپ، قۇلاقتى بىتەپ، اۋىزدى بۋىپ وتىرا بەرەسىزدەر. ماسەلەنى شەشەتىن ۋاقىت ءوتىپ بارا جاتىر. ەرتەڭ، «قولىمىزدى مەزگىلىنەن كەش سەرمەدىك» دەپ جۇرمەڭىزدەر. سەرۆيستىك جانە باسقا دا مەردىگەر كومپانيالار بيۋدجەتكە سالىعىن تولەپ، وزدەرىنە ينۆەستيتسيا قۇيىپ، حالىقتى تۇراقتى جۇمىسپەن قامتاماسىز ەتۋگە مۇددەلى. ءبىراق كەلەسى فاكتورلار: تەندەرلەردىڭ ادىلەتسىز ءوتۋى، جەمقورلىق، تاريفتەردىڭ تومەندىگى، باعا دەمپينگىسى جانە باسقا دا ماسەلەلەر وعان مۇمكىندىك بەرمەي وتىر. بۇل ءوز كەزەگىندە كومپانيالارداعى جالاقى دەڭگەيىنىڭ تومەن بولۋىنا، الەۋمەتتىك پاكەتتەردىڭ تولەنبەۋىنە، ەڭبەك قاۋىپسىزدىگىنىڭ ساقتالماۋىنا، تەحنيكالاردىڭ جاڭالانباۋىنا سەبەپ بولىپ وتىر. ايتا كەتەتىن جايت، وتكەن سەنبى كۇنى اقتاۋ قالاسىندا ەرەۋىلگە شىققان «بەرالي ماڭعىستاۋ Company» مەكەمەسىنىڭ باسشىلارىمەن كەزدەستىم، جوعارىدا كەلتىرىلگەن كەمشىلىكتەردى ولار دا ايتتى»، - دەدى دەپۋتات.
ونىڭ پايىمىنشا، «سامۇرىق- قازىنا» قورى وزدەرىنىڭ ەرەجەلەرىنە ءتيىستى وزگەرىستەردى شۇعىل تۇردە ەنگىزۋى قاجەت.
«بىرىنشىدەن، باعا دەمپينگىسىنە شەكتەۋ قويۋ كەرەك. مىسالى، تەندەر كەزىندە باعانى 10 پايىزدان تومەن تۇسىرمەۋ كەرەك. ەكىنشىدەن، سەرۆيستىك كومپانيالارمەن كوپجىلدىق كەلىسىمشارتتارعا وتىرۋ ماسەلەسى شەشىلسىن، ياعني كومپانيالار جۇمىسىنىڭ تۇراقتىلىعىن قامتاماسىز ەتۋ قاجەت. ۇشىنشىدەن، تەندەرگە شىعارىلاتىن جۇمىستار مەن قىزمەتتەردىڭ قارجى كولەمىندە ەڭبەكاقى قورى جانە الەۋمەتتىك پاكەت بولەك كورسەتىلىپ، ول باعا ويىنىنا تۇسپەۋى كەرەك. بۇل جۇمىسشىلاردىڭ دۇرىس جالاقى الۋىنا، الەۋمەتتىك جاعىنان قورعالۋىنا كەپىلى بولادى جانە تەندەردى ۇتىپ العان كومپانيالارداعى جاعدايدى مەملەكەتتىك ورگاندار مەن تاپسىرىس بەرۋشى جاعىنان باقىلاپ وتىرۋعا مۇمكىندىك تۋادى. بۇدان باسقا كەشەگى داۋ تۋعىزعان تەندەرلىك پروتسەدۋرالاردى جان- جاقتى زەرتتەپ، ەگەر كەمشىلىكتەر انىقتالسا، ءتيىستى شەشىم قابىلداماعان كۆازيمەملەكەتتىك مەكەمەلەردىڭ لاۋازىمدى تۇلعالارىنىڭ جاۋاپكەرشىلىگى قارالسىن»، - دەدى ەدىل جاڭبىرشين.
بۇدان بۇرىن حابارلانعانداي، استانادا نارازىلىققا شىققان مۇنايشىلار جاڭاوزەنگە قايتتى.
