ءبارىمىزدىڭ ماقساتىمىز ءبىر: نۇرلان نوعايەۆ ماڭعىستاۋ حالقىنا ۇندەۋ جاسادى
«قۇرمەتتى ماڭعىستاۋلىقتار! قادىرلى جەرلەستەر! بۇل جاعدايدىڭ بارشامىزدىڭ كوڭىلىمىزگە قاياۋ ءتۇسىرىپ وتىرعانى جاسىرىن ەمەس. وسى ساتتە اشۋ ۇستىندە اسىعىس شەشىم قابىلداماي، سابىر ساقتاعانىمىز ءجون. ءبىز كەز كەلگەن تۇيتكىلدى ماسەلە مەن قيىندىقتاردى اقىلمەن شەشىپ، ابىرويمەن الىپ كەلەمىز. قوعامداعى شيەلەنىستى ودان ءارى ۋشىقتىرۋ، زاڭ مەن قۇقىقتىق نورمالاردى بۇزۋ - جاعدايدىڭ تۇراقسىزدانۋىنا اكەلەدى، ماسەلەنى شەشپەيدى. بارشاڭىزدى سابىر ساقتاپ، ەل تىنىشتىعىن بۇزباۋعا شاقىرامىن. ءبىز بۇل جاعدايدىڭ تەك زاڭ شەڭبەرىندە ءادىل شەشىلگەنىن قالايمىز. بارشامىزدىڭ ماقساتىمىز ءبىر - ەرتەڭگى كۇنگە دەگەن سەنىمدىلىك پەن ەلدىڭ اماندىعى، جۇرتتىڭ تىنىشتىعى» دەلىنگەن اكىمنىڭ ۇندەۋىندە.
ونىڭ ايتۋىنشا، قازىر اسىرەسە ارانداتۋشىلارعا ەرىپ كەتپەي، ولاردىڭ ەل ىشىنە ىرىتكى سالىپ، تىنىشتىقتى بۇزۋىنا جول بەرمەۋىمىز قاجەت.
«ءبارىمىزدىڭ ماقساتىمىز ءبىر. حالقىمىز ادال ەڭبەك ەتىپ، اتقارعان جۇمىسىنا ساي ەڭبەكاقىسىن الىپ، ەرتەڭىنە سەنىممەن قاراپ، سىيلاستىقتا ءومىر ءسۇرۋدى قالايمىز جانە ونى جۇزەگە اسىرۋ ءۇشىن جۇمىستانۋدامىز. كاسىپورىنداردا تىنىشتىق پەن تۇراقتىلىقتىڭ بولعانى ءبارىمىز ءۇشىن دە ءتيىمدى. قازىر قاسيەتتى رامازان ايى - مەيىرىم مەن رۋحاني تازارۋ ايى. ءبىز سىزدەرمەن وسىعان دەيىن بىرلەسكەن كۇش- جىگەرىمىزدىڭ ارقاسىندا تالاي سىن- ساعاتتاردان وتتىك، وعان تاريح كۋا. بۇل تۇيتكىلدى دە اۋىزبىرشىلىكپەن، ىنتىماقپەن ەڭسەرەمىز دەپ سەنەمىن. حالقىمىز تىنىش، ەل ىرگەسى - ءبۇتىن بولسىن» دەيدى نۇرلان نوعايەۆ.
ەسكە سالا كەتەيىك، 10- ساۋىردە ەنەرگەتيكا مينيسترلىگى عيماراتىنىڭ الدىنا 70-كە جۋىق جاڭاوزەندىك جينالدى.
ەنەرگەتيكا ءمينيسترى الماسادام ساتقاليەۆ ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا ۆەدومستۆو عيماراتىنىڭ ماڭايىندا تۇنەپ شىققان جاڭاوزەندىك جۇمىسشىلاردىڭ تالابى بويىنشا رەسمي شەشىم ازىرلەنىپ جاتقانىن ايتتى.
بۇل ماسەلەگە پىكىر بىلدىرگەن ۆيتسە- پرەمەر التاي كولگىنوۆ زاڭ اياسىندا ارەكەت ەتۋ قاجەتتىگىن، «تەندەردەن ۇتىلعان كومپانيانىڭ قايتادان ۇتىپ شىققانىن تالاپ ەتۋ» دۇرىس ەمەستىگىن ايتتى.
كەشە كەشكىسىن ەنەرگەتيكا مينيسترلىگى الدىنا جينالعان ءبىر توپ جاڭاوزەندىك مۇنايشىلاردى پوليتسيا ۇستاپ اكەتتى.
كەيىن نارازىلىققا شىققان مۇنايشىلاردىڭ كوشباسشىلارى مالىمدەمە جاساپ، ەكى جاق كەلىسىمگە كەلگەنىن حابارلادى.
