جاڭاوزەن اكىمى ايبەك قوسۋاقوۆ الاڭعا جينالعان تۇرعىندارعا ۇندەۋ جولدادى
«قۇرمەتتى جاڭاوزەن قالاسىنىڭ تۇرعىندارى، قادىرلى جەرلەستەر! بۇگىن بارلىعىڭىز الەۋمەتتىك جەلىدەن جەرلەستەرىمىزدىڭ استانا قالاسىندا نارازىلىق اكسياسىن ۇيىمداستىرىپ، پوليتسيا بولىمىنە جەتكىزىلگەنى تۋرالى اقپاراتتى كورىپ وتىرسىزدار. قۇقىق قورعاۋ ورگاندارى وكىلدەرىنىڭ ايتۋىنشا، جەرلەستەرىمىزدىڭ جاعدايى جاقسى. ولارعا قولدانىستاعى زاڭناما شەڭبەرىندە اكىمشىلىك شارا قابىلدانادى. اكىمدىك تۇراقتى نەگىزدە قالا اۋماعىندا جاڭا جۇمىس ورىندارىن قۇرۋ، جۇمىسسىز ازاماتتاردى تۇراقتى جۇمىسپەن قامتاماسىز ەتۋ بويىنشا شارا قابىلداپ جاتىر» دەدى اكىم ۆيدەو ۇندەۋدە.
ونىڭ ايتۋىنشا، استانادا نارازىلىق بىلدىرگەن ازاماتتارمەن الدىن الا كەلىسسوز جۇرگىزىلگەن.
بۇرىن تەندەردەن جەڭىلگەن كومپانيادا جۇمىس ىستەگەندەرگە ەڭبەك جاعدايى مەن جالاقىسىن ساقتاي وتىرىپ، تەندەردى جەڭىپ العان كومپانياعا اۋىسۋ ۇسىنىلدى.
«ءبىراق ۇسىنىس قابىلدانبادى. قاسيەتتى رامازان ايىندا مەن بارشاڭىزدى سابىرعا شاقىرامىن! ماسەلەنىڭ ءمانىن بىلمەي، ەموتسياعا بەرىلمەۋلەرىڭىزدى جانە ارانداتۋشىلاردىڭ سوزىنە ەرىپ، قانداي دا ءبىر زاڭسىز ارەكەتتەرگە بارماۋلارىڭىزدى سۇرايمىن» دەپ تۇيىندەدى ءسوزىن ايبەك قوسۋاقوۆ.
ەسكە سالا كەتەيىك، كەشە ەنەرگەتيكا مينيسترلىگى عيماراتىنىڭ الدىنا 70-كە جۋىق جاڭاوزەندىك («Бералы Маңғыстау Company» كومپانياسىنىڭ بۇرىنعى قىزمەتكەرلەرى) جينالدى.
بۇگىن ەنەرگەتيكا ءمينيسترى الماسادام ساتقاليەۆ ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا ۆەدومستۆو عيماراتىنىڭ ماڭايىندا تۇنەپ شىققان جاڭاوزەندىك جۇمىسشىلاردىڭ تالابى بويىنشا رەسمي شەشىم ازىرلەنىپ جاتقانىن ايتتى.
بۇل ماسەلەگە پىكىر بىلدىرگەن ۆيتسە- پرەمەر التاي كولگىنوۆ زاڭ اياسىندا ارەكەت ەتۋ قاجەتتىگىن، «تەندەردەن ۇتىلعان كومپانيانىڭ قايتادان ۇتىپ شىققانىن تالاپ ەتۋ» دۇرىس ەمەستىگىن ايتتى.
بۇگىن كەشكە ەنەرگەتيكا مينيسترلىگى الدىنا جينالعان ءبىر توپ جاڭاوزەندىك مۇنايشىلاردى پوليتسيا ۇستاپ اكەتتى.
