ەلىمىزدە ءتورت تۇلىك مال سانى ءوسىپ، شوشقا ازايدى

استانا. قازاقپارات - ەلىمىزدە ءتورت ۇلىك مال مەن قۇستار سانى ءوسىپ، شوشقا ازايدى، دەپ حابارلايدى قازاقپارات ۇلتتىق ستاتيستكالىق بيۋروعا سىلتەمە جاساپ.

ۇلتتىق بيۋرو مالىمەتتەرىنە قاراعاندا، 2022-جىلعا جالپى مال شارۋاشىلىعى ءونىمىنىڭ ناقتى كولەم يندەكسى 2021-جىلمەن سالىستىرعاندا 100,8 پايىزدى قۇرادى، مۇنداعى ءوسىم مال شارۋاشىلىعى ونىمدەرىنىڭ نەگىزگى تۇرلەرىن ءوندىرۋ كولەمىنىڭ ۇلعايۋىنا بايلانىستى بولدى.

2021-جىلمەن سالىستىرعاندا ءتىرى سالماقتا مال مەن قۇستىڭ بارلىق تۇرلەرىن سويۋ نەمەسە ساتۋ كولەمى 0,2 پايىزعا، ءسۇت ءوندىرۋ - 1,9 پايىزعا، جۇمىرتقا - 4,4 پايىزعا ءوستى.

جىل ىشىندە مال مەن قۇس باسى كەلەسىدەي وزگەردى (2023-جىلعى 1- قاڭتاردا): جىلقى سانى - 10,5 پايىزعا، تۇيە - 6,5 پايىزعا، ءىرى قارا - 4,2 پايىزعا، قوي مەن ەشكى - 4,4 پايىزعا، قۇستار - 4 پايىزعا ءوستى، شوشقا سانى 9,2 پايىزعا ازايدى.

2022-جىلعا ءبىر ساۋىن سيىردىڭ ورتاشا ءسۇت ونىمدىلىگى 2021-جىلمەن سالىستىرعاندا 2,4 پايىزعا، ءبىر جۇمىرتقالايتىن تاۋىقتىڭ ورتاشا جۇمىرتقا ونىمدىلىگى 19,5 پايىزعا ءوستى، شارۋاشىلىقتا سويىلعان نەمەسە سويۋعا ساتىلعان ءبىر باس ءىرى قارانىڭ ورتاشا ءتىرى سالماعى 2021-جىلعى دەڭگەيدە قالدى.

ايتا كەتۋ كەرەك، مال شارۋاشىلىعى ونىمدەرى، مال مەن قۇس باسىنىڭ سانى تۋرالى دەرەكتەر اۋىل شارۋاشىلىعى كاسىپورىندارى، شارۋا نەمەسە فەرما قوجالىقتارى، جەكە كاسىپكەرلەر، ءۇي شارۋاشىلىقتارى ۇسىنعان ءارتۇرلى كەزەڭدىك ستاتيستيكالىق بايقاۋلار نەگىزىندە، سونداي-اق ءۇي شارۋاشىلىقتارى دەرەكتەرى بويىنشا قالىپتاستىرىلادى.