رەسەي پرەزيدەنتى كۇزدە قازاقستانعا كەلمەك

ماسكەۋ. قازاقپارات - ماسكەۋدە قازاقستان مەن رەسەي سىرتقى ىستەر مينيسترلەرىنىڭ كونسۋلتاتسيالارى ءوتىپ جاتىر، دەپ حابارلايدى قازاقپاراتتىڭ مەنشىكتى ءتىلشىسى.

كەزدەسۋ ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋدىڭ ماسكەۋگە رەسمي ساپارى اياسىندا وتۋدە.

مۇرات نۇرتىلەۋ رەسەي ادەتتەگىدەي قازاقستاننىڭ نەگىزگى ستراتەگيالىق جانە باس ەكونوميكالىق سەرىكتەسى ەكەنىن اتاپ ءوتتى. ەكى ەلدى دوستىق پەن تاتۋلىققا نەگىزدەلگەن ۇزاق مەرزىمدى ءارى بەرىك قارىم- قاتىناس بايلانىستىرادى.

«ءوزارا ءىس- قيمىلدىڭ قارقىندى سيپاتى مەن ەكى ەلدىڭ مەملەكەت باسشىلارى اراسىنداعى دوستىق قارىم- قاتىناستىڭ ارقاسىندا قارقىندى، سەنىمدى جانە سىندارلى ەكىجاقتى ساياسي ديالوگ جولعا قويىلدى. ەكىجاقتى ساۋدا - ەكونوميكالىق بايلانىس ورناتىلىپ، بەرىك شارتتىق- قۇقىقتىق بازا قۇرىلدى»، - دەدى ەلىمىزدىڭ سىرتقى ىستەر ءمينيسترى.

«وسى مۇمكىندىكتى پايدالانا وتىرىپ، بيىل كۇزدە رەسەي فەدەراتسياسىنىڭ پرەزيدەنتى ۆلاديمير ۆلاديميروۆيچ پۋتيننىڭ قازاقستانعا ساپارىن ۇيىمداستىرۋعا دايىندىعىن راستاۋ باعىتىنا العىس بىلدىرەمىز. ول ساپار اياسىندا جەمىستى كەلىسسوزدەر ءوتىپ، ءوڭىرارالىق فورۋم ۇيىمداستىرا الامىز دەپ ويلايمىن. اتالعان ماڭىزدى ءىس- شارانى ۇيىمداستىرۋ بويىنشا جۇمىس ىستەپ جاتىرمىز. فورۋم قوستاناي قالاسىندا وتەدى»، - دەپ تولىقتىردى مۇرات نۇرتىلەۋ.

رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆ قازاقستاندىق ارىپتەسىن جۋىردا وتكەن پارلامەنتتىك سايلاۋ جانە پرەمەر- ءمينيستردىڭ ورىنباسارى - سىرتقى ىستەر ءمينيسترى بولىپ تاعايىندالۋىمەن قۇتتىقتادى.

«ءبىز پرەزيدەنتتەرىمىز قول جەتكىزگەن ۋاعدالاستىقتاردى ورىنداۋ، ەكىجاقتى قارىم- قاتىناس ساباقتاستىعىن قامتاماسىز ەتۋ بويىنشا بەلسەندى جۇمىس ىستەۋدى جالعاستىراتىنىمىزعا سەنىمدىمىن. سىزدە وتە باي جۇمىس تاجىريبەسى بار، سونىڭ ىشىندە سىرتقى ساياسات سالاسىندا. وداقتاس، ستراتەگيالىق ارىپتەستىك قارىم- قاتىناستى ودان ءارى دامىتا بەرەتىنىمىزگە سەنىمدىمىن»، - دەدى رەسەي س ءى م- ءنىڭ باسشىسى.

سىرتقى ىستەر مينيسترلەرىنىڭ كونسۋلتاتسيالارى «تەت- ا- تەت» رەجيمىندە جانە كەڭەيتىلگەن فورماتتا وتۋدە. كەزدەسۋ قورىتىندىسى بويىنشا قازاقستان مەن رەسەي سىرتقى ىستەر مينيسترلىگى اراسىنداعى 2023-2024 -جىلدارعا ارنالعان ىنتىماقتاستىق جونىندەگى ءىس- شارالار جوسپارىنا قول قويۋ جوسپارلانۋدا.

ەسكە سالايىق، كۇنى كەشە سىرتقى ىستەر ءمينيسترى مۇرات نۇرتىلەۋدىڭ رەسمي ساپارمەن رەسەيگە باراتىنى تۋرالى حابارلاعان ەدىك.

نارىمبەك ىسماعۇلوۆ