قازاقستاندىقتار سەنىمحاتتاردى ونلاين الۋعا بولادى

استانا. قازاقپارات - بۇگىن ەل اۋماعىندا «سيفرلىق نوتاريات» اتتى پيلوتتىق جوبا ىسكە قوسىلدى. ەندىگى ۋاقىتتا قازاقستاندىقتار سەنىمحاتتاردى نوتاريۋسقا بارماي-اق ونلاين راسىمدەي الادى، دەپ حابارلايدى قازاقپارات ءتىلشىسى.

جاڭا سيفرلىق جوبانى ادىلەت جانە سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى بىرلەسىپ قولعا الىپ وتىر.

مينيسترلەردىڭ ايتۋىنشا، وسىعان دەيىن كليەنتتەر سەنىمحاتتى راسىمدەۋ ءۇشىن قۇجاتقا قول قويدىرىپ، ونى نوتاريۋسقا بارىپ كۋالاندىرۋى كەرەك بولسا، ەندى اتالعان قىزمەت eGov mobile موبيلدى قوسىمشاسىندا ونلاين قولجەتىمدى.

«مەملەكەت باسشىسى eGov mobile موبيلدى قوسىمشاسى بازاسىندا مەملەكەت، حالىق جانە بيزنەستىڭ ءوزارا ءىس-قيمىلى ءۇشىن ءتيىستى سيفرلىق ينفراقۇرىلىمدى قۇرۋدى تاپسىرعان بولاتىن. بۇگىنگى تۇساۋى كەسىلىپ جاتقان «سيفرلىق نوتاريۋس» پيلوتتىق جوباسى سول باعىتتاعى جۇمىستاردىڭ ءبىرى. قىزمەت الۋدا قازاقستاندىقتاردىڭ ءومىرىن جەڭىلدەتۋ باعىتىندا پايدالى جوبالاردى جۇزەگە اسىرۋدى جالعاستىرامىز»، - دەدى سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين.

eGov mobile موبيلدى قوسىمشاسىندا سەنىمحاتتى راسىمدەۋ نۇسقاۋلىعى:

- الدىمەن ءوتىنىمدى تولتىرىپ، وعان ەلەكتروندى سيفرلىق قول قويۋ قاجەت؛

- جەكە باسىن راستاۋ ءۇشىن نوتاريۋس قىزمەتكەرىنە بەينەباقىلاۋ ارقىلى قوڭىراۋ شالۋ كەرەك؛

- كورسەتىلگەن قىزمەتتىڭ اقىسىن تولەۋى ءتيىس؛

- ساندىق قۇجاتتار بولىمىندە سەنىمحات دايىن تۇرادى.