نەلىكتەن كەي ەر ادامدارعا وزىنەن ۇلكەن ايەلدەر ۇنايدى؟
كوپشىلىكتىڭ ويىنشا، جۇپتا ەر ادام ايەلدەن ۇلكەن بولۋى كەرەك. الايدا قازىر جۇپتا ايەلدىڭ ەركەكتەن ۇلكەن بولۋى دا ءجيى كەزدەسەدى. نەلىكتەن كەيبىر ەر ادامدارعا وزىنەن ۇلكەن ايەلدەر ۇنايدى؟
Massaget.kz ءتىلشىسى وتباسىلىق پسيحولوگ اياۋلىم ءومىرعالي قىزىنىڭ پىكىرىن الدى.
بارلىق جاعدايدا ەمەس، ءبىراق كوبىنە ەر ادامدى وزىنەن ۇلكەن ايەلدىڭ مىناداي قاسيەتتەرى باۋراپ الادى:
- جاسى ۇلكەن ايەلدەر ومىردەن نە قالايتىنىن بىلەدى؛
- ومىرلىك تاجىريبەسى بار؛
- ومىرگە كوزقاراسى باسقاشا؛
- ءوزىن-ءوزى باعالاۋى جوعارى؛
- تالعامى جاقسى؛
- جاقسى اڭگىمەلەسەدى؛
- جاس قىزدارعا قاراعاندا قامقور كەلەدى؛
- تاماق جاقسى پىسىرەدى؛
- سابىرلى ءارى سالماقتىراق؛
- ۇلكەن ايەل «جابىسپايدى».
پسيحولوگ اياۋلىم ءومىرعالي قىزىنىڭ ايتۋىنشا، كوپشىلىك قىزدار «ايەل بولۋدى» بىلمەيدى.
«پسيحولوگيالىق تۇرعىدا قارايتىن بولساق، نازىك جاندىلاردا «قىز»، «ايەل» جانە «اپا» پروتسەسى بولادى. ال كوپ ايەلدەر «قىز» پروتسەسىنەن بىردەن «اپا» پروتسەسىنە ءوتىپ كەتەدى. ولار «ايەل بولۋدى» بىلمەيدى، ونى ۇيرەنبەگەن»، - دەيدى پسيحولوگ.
مامان قىزداردىڭ «ايەل بولا الماۋىنا» كوپتەگەن فاكتورلار اسەر ەتەتىنىن ايتتى.
«قانداي دا ءبىر قىزعا «ايەل بولۋ» قيىن بولۋى مۇمكىن. مىسالى، اناسى قينالعان نەمەسە تاياق جەگەن، اكەسى اناسىن تاستاپ كەتكەن نەمەسە كوزىنە ءشوپ سالعان، وسىنىڭ ءبارىن قىز كورگەن بولسا، ونداي قىز ايەل بولعىسى كەلمەيدى. ول بىردەن اپا جاعدايىنا ءوتىپ كەتەدى. مۇنداي تيپتەگى ايەلدىڭ قاسىنداعى ەركەك تە دامىمايدى. مىسالى، ول اقشا تاپپايدى جانە ت. ب»، - دەدى ول.
پسيحولوگ اياۋلىم ءومىرعالي قىزى ءار ايەلگە ءوز-وزىمەن جۇمىس ىستەۋگە جانە ءوزىن جاقسى كورۋگە كەڭەس بەردى.
«ەر ادامدى ايەلدىڭ ەنەرگياسى تارتادى. ارينە، بارلىعى ەمەس، ءبىراق جاسى ۇلكەن بولسا دا، كەي ايەلدەر «ايەل بولۋدى» بىلەدى جانە وزدەرىنىڭ ايەلدىگىن جاقسى كورەدى. سوندىقتان دا ولارعا ەركەكتەر تارتىلادى»، - دەپ قورىتىندىلادى پسيحولوگ.
