بيبىگۇل جەكسەنباي ازاماتتىق قورعانىس سالاسىنا قاتىستى ۇسىنىس ايتتى
ازاماتتىق قورعانىس جۇيەسىندە ءورت ءسوندىرۋ بولىمدەرى جەتىسپەيدى، سونىمەن قاتار ولاردىڭ شتاتتارى دا تولىق ەمەس، دەپ حابارلايدى قازاقپارات ءتىلشىسى.
سەناتور ازاماتتىق قورعاۋ سالاسىنداعى مامانداردى وقىتۋ مەن دايارلاۋ جاعدايىنا دا توقتالدى. ەلىمىزدە بولاشاق قۇتقارۋشىلاردى وقىتاتىن جالعىز عانا جوعارى وقۋ بار. ول - مالىك عابدۋللين اتىنداعى ازاماتتىق قورعاۋ اكادەمياسى.
الايدا دەپۋتات اكادەميا توتەنشە جاعداي مينيسترلىگى مەن ونىڭ مەكەمەلەرىن كادرلارعا دەگەن سۇرانىسىن تولىق قامتاماسىز ەتەتىنىنە كۇمان كەلتىردى. جوعارى وقۋ ورنىنىڭ ماتەريالدىق-تەحنيكالىق جابدىقتالۋ جاعدايى دا ناشار.
«سەنات كوميتەتىنىڭ مۇشەلەرى بيىلعى ناۋرىز ايىندا اكادەمياعا بارىپ، وقۋ ۇدەرىسىنىڭ دامۋى تۋرالى ايتۋ مۇمكىن ەمەستىگىنە كوز جەتكىزدى. ويتكەنى كۋرسانتتاردىڭ تۇرۋى مەن تاماقتانۋىنىڭ قاراپايىم جاعدايى جاسالماعان. ولار وسى جىلدىڭ اقپان ايىنان باستاپ پراكتيكالىق ساباقتارعا ارالاسا الماي، قاشىقتان وقۋعا ءماجبۇر بولعان. بۇل ولاردىڭ جاۋىنگەرلىك دايارلىعى مەن وقۋىنداعى ەلەۋلى كەمشىلىك بولىپ وتىر»، - دەدى بيبىگۇل جەكسەنباي.
دەپۋتات ساۋال بارىسىندا وقىتۋشىلار قۇرامىنىڭ پروبلەمالارىنا دا توقتالدى. سەناتور كەيىنگى ۋاقىتتا وقىتۋشىلار قۇرامىنىڭ جالاقىسى تومەن بولۋىنا وراي اكادەميادان كادرلاردىڭ كەتىپ جاتقانىن ايتتى. بيىل جالاقىسى وسكەن توتەنشە جاعدايلار مينيسترلىگى قىزمەتكەرلەرىنىڭ تىزبەسىنە اكادەميا ماماندارى كىرگەن جوق.
«مەملەكەت باسشىسىنىڭ اكادەميانىڭ جاڭا كەشەنىن سالۋ جونىندەگى تاپسىرماسىن ۋاقتىلى ورىنداۋ ءۇشىن ۆەدومستۆوارالىق بارلىق راسىمدەردى جەدەل جۇرگىزە وتىرىپ، رەسپۋبليكالىق بيۋجەتتەن قارجى ءبولۋدى قامتاماسىز ەتۋ قاجەت. سونداي-اق قولدانىستاعى عيماراتتار مەن قۇرىلىستاردى جوندەۋگە قاراجات ءبولىپ، اكادەميانىڭ پروفەسسور-وقىتۋشىلار قۇرامى جالاقىسىنا قاتىستى ماسەلەنى قاراستىرۋ كەرەك»، - دەدى ول.
