قازاقستان ارقىلى قىتايدان تۇركياعا گۋمانيتارلىق جۇك جەتكىزىلەدى

استانا. قازاقپارات - «قازاقستان تەمىر جولى» ۇ ك» ا ق شاتتل-پويىزدارمەن قىتايدان تۇركياعا گۋمانيتارلىق جۇك جەتكىزەدى، دەپ حابارلايدى قازاقپارات كومپانيانىڭ باسپا ءسوز قىزمەتىنە سىلتەمە جاساپ.

«ترانسكاسپي حالىقارالىق كولىك باعىتى (ت ح ك ب) بويىنشا قازاقستان ارقىلى قىتايدان تۇركياعا شاتتل- پويىزدارمەن گۋمانيتارلىق جۇك تيەلگەن 200 كونتەينەر جەتكىزىلەدى. قازاقستان ارقىلى جەدەل جەتكىزۋ مەملەكەت باسشىسى قاسىم-جومارت توقايەۆتىڭ تاپسىرماسىمەن ۇيىمداستىرىلدى. قازاقستان اۋماعى بويىنشا پويىز رەكوردتىق قىسقا مەرزىمدە - 90 ساعاتتا ءجۇرىپ وتەدى»، - دەلىنگەن مالىمەتتە.

ق ت ج اقپاراتىنا سۇيەنسەك، ءبىرىنشى پويىزدا سالماعى 40 فۋتتىق 50 كونتەينەر بار. كونتەينەرلەرگە جەر سىلكىنىسىنەن زارداپ شەككەن ادامداردى ۋاقىتشا ورنالاستىرۋعا ارنالعان شاتىرلار تيەلگەن.

«تاعى 150 كونتەينەر جونەلتىلەدى دەپ جوسپارلانۋدا. «KTZ Express» ا ق شاتتل-پويىزداردىڭ وپەراتورى بولىپ تابىلادى»، - دەلىنگەن كومپانيا حابارلاماسىندا.

ايتا كەتەيىك، شاتتل-سەرۆيستىڭ پايدا بولۋىمەن ق ح ر- دان گرۋزيا پورتتارىنا دەيىن جۇكتەردى جەتكىزۋ مەرزىمى ءۇش ەسەگە - 18 تاۋلىككە دەيىن، تۇركيا پورتتارىنا - 25 تاۋلىككە دەيىن قىسقاردى. قازاقستان تەرريتورياسىندا جۇك كاسپي تەڭىزىنە (اقتاۋ پورتى) دەيىن جەتكىزىلەدى، ودان ءارى ازەربايجان، گرۋزيا، تۇركيانىڭ مەرسين قالاسىنا دەيىن جونەلتىلەدى.

بۇل تاسىمالداۋدى ت ح ك ب مارشرۋتىنا قاتىسۋشى تاراپتار تۇركياعا گۋمانيتارلىق كومەك كورسەتۋ شەڭبەرىندە وتەۋسىز نەگىزدە جۇزەگە اسىرىپ وتىر.