ۇيدە حيرۋرگيالىق كومەك كورسەتۋ: جاڭا ستاندارت ەنگىزىلدى

استانا. قازاقپارات - دەنساۋلىق ساقتاۋ ءمينيسترىنىڭ بۇيرىعىمەن حيرۋرگيالىق (ءىش، كەۋدە، كولوپروكتولوگيالىق) كومەك كورسەتۋدى ۇيىمداستىرۋدىڭ جاڭارتىلعان ستاندارتى بەكىتىلدى، دەپ حابارلايدى قازاقپارات ۆەدومستۆو سايتىنا سىلتەمە جاساپ.

بۇيرىقپەن بەكىتىلگەن حيرۋرگيالىق كومەك كورسەتۋدى ۇيىمداستىرۋ ستاندارتى قازاقستان رەسپۋبليكاسىندا حيرۋرگيالىق كومەكتى ۇيىمداستىرۋعا قويىلاتىن جالپى قاعيداتتار مەن تالاپتاردى بەلگىلەيدى.

حيرۋرگيالىق كومەك كورسەتۋدى ۇيىمداستىرۋ ءتارتىبى حالىق دەنساۋلىعى تۋرالى كودەكسكە سايكەس مەديتسينالىق كومەكتىڭ شارتتارىنا، نىساندارىنا سايكەس باياندالعان. ۇيدە، شۇعىل جانە جوسپارلى تۇردە حيرۋرگيالىق كومەك كورسەتۋ بولىمدەرى ەنگىزىلگەن.

جاڭا ستاندارتتا شتات سانى، حيرۋرگيالىق كومەك كورسەتەتىن دەنساۋلىق ساقتاۋ ۇيىمدارىن جاراقتاندىرۋ كوزدەلگەن.

گەوگرافيالىق قولجەتىمدىلىكتى، كادرلىق جانە ماتەريالدىق-تەحنيكالىق رەسۋرستاردى، حالىقتىڭ مەديتسينالىق كومەكتى تۇتىنۋ كولەمىن، جەدەل ارالاسۋ قاۋپىنىڭ دارەجەسىن ەسكەرە وتىرىپ، ستاتسيونارلىق جاعدايلاردا حيرۋرگيالىق كومەك كورسەتۋدى وڭىرلەندىرۋ كوزدەلگەن.

قۇجاتتا سارعايۋ جانە ءىش قۋىسىنىڭ سۇيىقتىق جيناقتارىنىڭ درەناجى كەزىندە جەكەلەگەن اۋىر جاعدايلاردا مامانداندىرىلعان حيرۋرگيالىق كومەك ورتالىقتارىن ۇيىمداستىرۋ كوزدەلگەن.