قۋاندىقتارىڭدى قۇلاتتىق: قىزىلوردادا جاسوسپىرىمدەر بالانى تەپكىلەگەن ۆيدەونى جەلىدە ماقتانىشپەن بولىسكەن
قىزىلوردا وبلىسى قازالى اۋدانىندا مەكتەپ وقۋشىلارىنىڭ اراسىندا توبەلەس ورىن الدى. وقيعا ايتەكە بي كەنتىندەگى ساياباقتا كۇندىزگى ۋاقىتتا بولعان. الەۋمەتتىك جەلىلەردە تاراعان ۆيدەوتۇسىرىلىمدە 5 بالا جالعىز ءتۇيىر بالاعا جابىلىپ، تەپكىلەپ جاتقانى جۇرتشىلىقتى شوشىتىپ، قوعامدىق رەزونانس تۋدىردى. قازالى اۋدانى اكىمدىگىنىڭ مالىمدەمەسىنە سۇيەنسەك، قازالى اۋدانىندا ورىن العان توبەلەسكە قاتىستى انىقتاۋ شارالارى جۇرگىزىلدى، دەپ حابارلايدى Qaz365.kz.
ناتيجەسىندە كامەلەتكە تولماعان، تاياق جەگەن بالانى جابىلىپ سوققىعا جىققان ايتەكە بي كەنتىندەگى №266-مەكتەپ- ليتسەيدىڭ 5 وقۋشىسى انىقتالىپ، 7-ءساۋىر كۇنى تۇنگى 00:00 شاماسىندا اۋداندىق پوليتسيا بولىمىنە جەتكىزىلدى.
«بۇگىنگى تاڭدا تەرگەۋ جۇمىستارى جۇرگىزىلۋدە. زاڭ اياسىندا قاتاڭ شارا كورىلىپ، جازاسىن الاتىن بولادى. ءقازىر بالا اۋرۋحانادا ەم قابىلداۋدا. بۇگىن اۋدان اكىمى مەن وبلىستىق ءبىلىم باسقارماسىنىڭ باسشىسى ارنايى بارىپ، بالانىڭ جاعدايىن كوردى. جاعدايى ءبىرقالىپتى»، - دەلىنگەن مالىمدەمەدە.
سوققىعا جىعىلىپ، اۋرۋحانادا جاتقان جەتكىنشەكتىڭ قال-جاعدايىن سۇراماق بولىپ اناسىنا حابارلاستىق. زارداپ شەككەن بالانىڭ اناسىنىڭ ايتۋىنشا، ۇلى قۋاندىق ءسابيت ۇلى ون بەستە. قۋاندىق - اۋداننىڭ نامىسىن تاەكۆوندو سپورتىنان رەسپۋبليكا كولەمىندە قورعاپ جۇرگەن، ءوزى وقيتىن №70-مەكتەپتىڭ ماقتاۋلى وقۋشىسى. وسى ۋاقىتقا دەيىن ۇلىنىڭ تارتىبىنە بايلانىستى مەكتەپ مۇعالىمدەرىنەن ەشقانداي شاعىم، ەسكەرتۋ جاسالماعانىن ايتادى.
«وقيعا بالام تۇسكى ۋاقىتتا ساباقتان قايتىپ كەلە جاتقاندا بولعان. ۆيدەودا كورگەندەرىڭىز 5-6 بالا عانا، شىن مانىسىندە مەنىڭ بالاممەن سويلەسۋگە كەلگەن جەتكىنشەكتەردىڭ سانى كوپ بولىپتى. كەيبىرى قاشىپ ۇلگەرگەن. بالامدى ساياباققا سويلەسەمىن دەپ الداپ اپارىپ، باس جاعىنان قاتتى زاتپەن ۇرىپ قۇلاتقان. ارمەن قاراي كورىنىس ۆيدەوداعى كورگەندەرىڭىز. بالامدى سونشالىقتى اياماي، اسقان قاتىگەزدىكپەن نە ءۇشىن تەپكىلەگەنىن بىلمەي وتىرمىن. بالاما ۆيدەونى كورسەتسەم، سوققىدان كەيىن ەشنارسە بىلمەي قالعانىن، ءتىپتى كىم تەپكىلەپ جاتقانىن بىلمەيتىنىن ايتادى. ۆيدەوتۇسىرىلىمدى 5 بالانىڭ ىشىندەگى بىرەۋى ءتۇسىرىپ، ۆاتساپ جەلىسىنە «قۋاندىقتارىڭدى قۇلاتتىق» دەپ ماقتانىشپەن سالعانىن بىلدىك. كەيىن ۆيدەو ينستاگرامعا سالىنىپ، بارلىق جەلىگە تاراپ كەتتى. بالام ءقازىر قازالى تەمىرجول اۋرۋحاناسىندا ءتيىستى ەمىن قابىلداۋدا. سوققىعا جىققاندارعا قاتىستى ايتار بولسام، پوليتسيا ءبولىمىنىڭ قىزمەتكەرلەرى تەرگەۋ امالدارىن جۇرگىزۋدە»، - دەدى اناسى.
قازالى اۋداندىق پوليتسياسىنىڭ «جاس ءوسپىرىم جاڭبىرلى كۇنى قۇلاپ، باسىن جاراقاتتاپ العان» دەگەن تۇسىنىكتەمەسى كوپشىلىكتىڭ ىزاسىن تۋدىردى.
«وسىنداي تۇسىنىكتەمە بەرىپ، جۇمىسىنا سالعىرتتىق تانىتقان پوليتسيا قىزمەتكەرلەرىنە قىزمەتتىك تەكسەرىس ءجۇرىپ جاتىر. مەكتەپ باسشىلارى مەن تاربيە ءىسى جونىندەگى ورىنباسارلارىنىڭ قىزمەتتىك جۇمىسىنا باعا بەرىلىپ، الداعى ۋاقىتتا شەشىم قابىلداناتىن بولادى»، - دەيدى جەرگىلىكتى بيلىك وكىلدەرى.
بۇل وقيعا ايماق باسشىسى نۇرلىبەك نالىبايەۆتىڭ تىكەلەي باقىلاۋىندا.
