الاياقتار ينتەرنەتتە جالعان جانارماي كارتالارىن ساتىپ جاتىر
كارتانى بەلگىلەنگەن باعامەن ساتىپ العاننان كەيىن، جانارماي قۇيۋ ستانتسياسىندا اقشا تولەۋدىڭ قاجەتى جوق دەلىنەدى. اقپاراتتى Stopfake.kz تەكسەرىپ كوردى، دەپ حابارلايدى قازاقپارات.
«قولدانىستا جوق جانارماي كارتالارى العاش رەت 2021 -جىلى رەسەيدە ساتىلا باستادى. الاياقتار كارتالاردى ارنايى ازىرلەنگەن سايت ارقىلى ساتقان، ال سەنگىش كولىك جۇرگىزۋشىلەرى اقشانى ولاردىڭ شوتىنا اۋدارىپ وتىرعان»، - دەلىنگەن سايتتا.
انىقتالعانداي، قازاقستاندا الاياقتىق سحەماسى ءسال باسقاشا.
«اۆتوكولىك جۇرگىزۋشىلەرىنە Helios, Qazaq Oil جانە «گازپروم» كومپانيالارىنىڭ جانارماي كارتالارى ۇسىنىلادى. ساتىلىم Telegram ارقىلى قوستانايدا راسىمەن دە جۇمىس ىستەپ تۇرعان كومپانيا اتىنان جاسالىپ جاتىر. الايدا، اشىق دەرەكتەرگە سۇيەنسەك، اتالعان فيرما ءورت سوندىرگىش قۇرالداردى تولتىرۋمەن اينالىسادى جانە جانارماي ساۋداسىنا ەشقانداي قاتىسى جوق. سونىمەن قاتار، 2Gis قىزمەتىندە جانارماي كارتالارىن الۋ ءۇشىن كومپانيانىڭ كەڭسەسىنە حابارلاسىپ، ول جەردەن ەشكىمدى تاپپاعان ادامداردىڭ پىكىرلەرى جازىلعان.
ايتا كەتەيىك، Helios ،Qazaq Oil جانە «گازپروم» رەسمي پورتالدارىندا جانارماي كارتالارىن دەلدالدار ارقىلى ساتۋ تۋرالى ەشتەڭە ايتىلماعان.
Qazaq Oil كارتالاردى كومپانيامەن شارت جاساسقاننان كەيىن رەسمي ساتۋ ورتالىقتارىندا 500 تەڭگەگە ساتىپ الۋدى ۇسىنادى.
ال Helios كومپانياسىنىڭ سايتىندا جانارماي كارتالارى تۋرالى اقپارات مۇلدەم جوق. ونىڭ ورنىنا كليەنتتەرگە ارنايى بونۋستىق كارتالاردى راسىمدەۋ ۇسىنىلادى.
«گازپروم» كومپانياسىندا كورپوراتيۆتىك كليەنتتەرگە ارنالعان جانارماي كارتالارى بار. ونى كومپانيامەن رەسمي كەلىسىمشارت جاساسقاننان كەيىن عانا ساتىپ الۋعا بولادى.
قورىتا ايتقاندا، جانارماي كارتالارىن ساتۋ جارناماسى - الاياقتاردىڭ ءىسى. كومپانيالاردىڭ جانارماي كارتالارى رەسمي بولىمدەردە ساتىلادى جانە ولاردى رەسمي كەلىسىمشارت جاسالعاننان كەيىن عانا ساتىپ الۋعا بولادى. قازنەتتە كارتالارى ساتىلىپ جاتقان كومپانيا مۇلدەم باسقا قىزمەتپەن اينالىسادى، جانە ونىڭ كارتالار ساتۋعا ەشقانداي قاتىسى جوق»، - دەپ قورىتىندىلايدى Stopfake.kz.
