ساپتا تۇرعاندا ەسىنەن تانىپ، قايتىس بولعان ساربازدىڭ ولىمىنە كىنالى انىقتالدى

تاراز. قازاقپارات - جامبىل وبلىسىنىڭ وتار اۋىلىندا ورنالاسقان اسكەري بولىمدە قازا تاپقان ماڭعىستاۋلىق الىبەك قالبايدىڭ ولىمىنە كىنالى انىقتالدى، دەپ حابارلايدى قازاقپارات ءتىلشىسى.

ساربازدىڭ ولىمىنە اتىراۋلىق ايبولات امانجولوۆ كۇدىكتى دەپ تانىلىپ، ول الماتىداعى تەرگەۋ يزولياتورىندا وتىرعان بولاتىن. بۇگىن الماتىدا اسكەري سوتتا ايبولات امانجولوۆقا قاتىستى سوت ۇكىمى شىقتى. ول قىلمىستىق كودەكستىڭ 440-بابى، 4-بولىگى بويىنشا كىنالى دەپ تانىلىپ (اسكەري قىزمەتشىلەر اراسىندا باعىنىشتىلىق قاتىناستار بولماعان كەزدە ولاردىڭ اراسىنداعى ءوزارا قارىم-قاتىناستاردىڭ جارعىلىق قاعيدالارىن بۇزۋ)، 9 جىلعا باس بوستاندىعىنان ايىرىلدى.

ەسكە سالايىق، الىبەك قالباي وتكەن جىلدىڭ 22- ساۋىرىندە ساپتا تۇرعان كەزدە كەنەتتەن ەسىنەن تانىپ قۇلاعان. الماتى گارنيزونىنىڭ اسكەري سوتى جامبىل وبلىسىنداعى اسكەري بولىمگە كەلگەن سوڭ ءتورت كۇننەن كەيىن قايتىس بولعان الىبەك قالبايدىڭ ءىسىن قايتا تەرگەۋگە جىبەرگەن بولاتىن. سوتتالۋشىلار مەن جابىرلەنۋشىلەر 18 جاستاعى جاۋىنگەردىڭ قازاسى تۋرالى ءىستى تەرگەۋ ناتيجەسىمەن كەلىسپەي، قايتا تەرگەۋگە جىبەرۋدى سۇراعان.

الىبەك قالباي ىسىنە بايلانىستى سوت بىلتىر 23- تامىزدا باستالىپ، وسىعان دەيىن 17- وتىرىسى وتكەن بولاتىن.

بۇل ماسەلەگە قاتىستى قازاقپارات بۇعان دەيىن جاس سارباز الىبەك قالبايدىڭ ءولىمى: ەكى اسكەري شەندى قىزمەتتەن قۋىلدى دەپ جانە اسكەري قىزمەتشى الىبەك قالبايدىڭ ولىمىنە قاتىستى كۇدىكتى ۇستالدى دەپ حابارلاعان بولاتىن.