وڭتۇستىك كورەياعا زاڭسىز كىرگەن ەكى قازاقستاندىق قاماۋدا وتىر - س ءى م

استانا. قازاقپارات - قازىر وڭتۇستىك كورەياعا زاڭسىز كىرگەن جەرلەستەرىمىز تەرگەۋ يزولياتورىندا قاماۋدا وتىر.

قازاقستاننىڭ وڭتۇستىك كورەياداعى ەلشىلىگى جەرگىلىكتى قۇقىق قورعاۋ ورگاندارى جانە ۇستالعان قازاقستاندىقتاردىڭ تۋىستارىمەن تۇراقتى بايلانىستا.

تولىعىراق سىرتقى ىستەر مينيسترلىگىنىڭ رەسمي وكىلى ايبەك سمادياروۆ ايتىپ بەردى، دەپ حابارلايدى قازاقپارات ءتىلشىسى.

«2023-جىلعى 24- ناۋرىزدا ينچحون اۋەجايىندا پاسپورتتىق باقىلاۋ ءوتۋ بارىسىندا تاشكەنتتەن كەلگەن 2 قازاقستان ازاماتىنا وڭتۇستىك كورەياعا كىرۋگە باس تارتىلدى. ولار دەپورتاتسيالاۋدى كۇتۋ ءۇشىن ارنايى بولمەگە ورنالاستىرىلعان. الايدا وتانداستارىمىز تۇندە قاشىپ، وڭتۇستىك كورەيا اۋماعىنا زاڭسىز كىرگەن. 26- ناۋرىزدا ءبىر قازاقستان ازاماتى ۇستالدى، ال 29- ناۋرىزدا ەكىنشى قازاقستاندىق كىناسىن مويىنداپ، پوليتسياعا ءوز ەركىمەن بەرىلدى»، - دەدى ايبەك سمادياروۆ مينيسترلىكتە وتكەن بريفينگىدە.

ونىڭ ايتۋىنشا، قازىر جەرلەستەرىمىز ينچحون قالاسىندا كوشى-قون ورتالىعىنداعى تەرگەۋ يزولياتورىندا قاماۋدا وتىر.

«وڭتۇستىك كورەيا ەلىنىڭ زاڭناماسىنا سايكەس، تەرگەۋ شارالارى 3 ايعا دەيىن سوزىلۋى مۇمكىن. تەرگەۋ مۇددەسى ءۇشىن وڭتۇستىك كورەيانىڭ قۇزىرەتتى ورگاندارى ءىستىڭ ەگجەي-تەگجەيىن اشپاي وتىر»، - دەيدى ول.

سونداي-اق، س ءى م رەسمي وكىلى كورەيا رەسپۋبليكاسى اۋماعىنا زاڭسىز كىرگەن وتانداستارىمىزعا بىرنەشە ايىپتىڭ تاعىلىپ وتىرعانىن ايتتى.

«قازاقستاننىڭ وڭتۇستىك كورەياداعى ەلشىلىگى جەرگىلىكتى قۇقىق قورعاۋ ورگاندارى جانە ۇستالعان قازاقستاندىقتاردىڭ تۋىستارىمەن تۇراقتى بايلانىستا. ەستەرىڭىزگە سالا كەتەيىك، كورەيا رەسپۋبليكاسىندا جۇمىس بەرۋشى راسىمدەيتىن ارنايى رۇقسات پەن ۆيزانىڭ بولۋى نەگىزىندە عانا جۇمىس ىستەۋگە بولادى. جۇمىسقا تۇرۋدىڭ باسقا جولدارى زاڭسىز ەكەنىن ەسكەرتەمىز»، - دەيدى س ءى م رەسمي وكىلى.

ەسكە سالايىق، ناۋرىزدىڭ سوڭىندا ەكى وتانداسىمىز وڭتۇستىك كورەياعا كىرۋگە تىيىم سالىنعانىنا قاراماستان اتالعان ەلگە زاڭسىز كىرىپ كەتكەنى تۋرالى حابارلاعان ەدىك.