يلحام الييەۆ قازاقستان پرەزيدەنتىن فيزۋليدە سالىنىپ جاتقان قۇرمانعازى اتىنداعى ورتالىقتىڭ اشىلۋىنا شاقىردى
«ءوزىمنىڭ جانە بارشا ازەربايجان حالقىنىڭ اتىنان گەيدار اليەۆتى قۇرمەت تۇتۋلارىڭىزعا، ونىڭ ەسىمىمەن قازاقستان استاناسىنىڭ ورتالىق كوشەلەرىنىڭ ءبىرىن اتاعاندارىڭىز، اكەمدى جانە ازەربايجان حالقىنىڭ ۇلى كوشباسشىسىن قۇرمەت تۇتقاندارىڭىز ءۇشىن تاعى دا ريزاشىلىعىمدى بىلدىرگىم كەلەدى. سونىمەن قاتار ازات ەتىلگەن قاراباقتا قۇرمانعازى اتىنداعى بالالار شىعارماشىلىعى ورتالىعىن سالۋ تۋرالى جەكە شەشىمىڭىز ءۇشىن دە العىسىمدى بىلدىرەمىن. ءىس جۇزىندە قۇرىلىس قازىردىڭ وزىندە وتە قارقىندى جۇرگىزىلىپ جاتىر جانە وسى مۇمكىندىكتى پايدالانا وتىرىپ، ءسىزدى اتالعان ورتالىقتىڭ اشىلۋىنا شاقىرامىن»، - دەدى يلحام اليەۆ اقوردادا قازاقستان پرەزيدەنتىمەن كەڭەيتىلگەن قۇرامداعى كەلىسسوز بارىسىندا.
ونىڭ پايىمىنشا، اتالعان ورتالىق ەكى حالىقتىڭ دوستىعى مەن باۋىرلاستىعىنىڭ جاقسى نىشانى بولماق.
«ويتكەنى، بىزگە قيراعان ينفراقۇرىلىمدى، ونىڭ ىشىندە الەۋمەتتىك ينفراقۇرىلىمدى قالپىنا كەلتىرۋ بويىنشا اۋقىمدى جۇمىس كۇتىپ تۇر جانە دە باۋىرلاس قازاقستاننان مۇنداي باستاما بۇكىل ازەربايجاندىقتاردا زور ريزاشىلىق سەزىمىن تۋدىرارى ءسوزسىز»، - دەدى يلحام اليەۆ.
