باس پروكۋراتۋرا بولات نازاربايەۆتىڭ توقالى ايتقان دەرەكتەرگە قاتىستى قىلمىستىق ءىس قوزعاۋ تۋرالى پىكىر ءبىلدىردى

استانا. قازاقپارات - باس پروكۋراتۋرا كاسىپكەر بولات نازاربايەۆتىڭ بۇرىنعى توقالى، ءانشى دينارا ءالجاننىڭ سۇحباتتا ايتقان دەرەكتەرگە قاتىستى قىلمىستىق ءىس قوزعالۋى تۋرالى سۇراققا جاۋاپ بەردى.

Massaget.kz ءتىلشىسى باس پروكۋراتۋراعا ارنايى ساۋال جولداپ، ءانشى دينارا ءالجاننىڭ جۋرناليست نۇرسەيىت جىلقىشىبايعا بەرگەن سۇحباتىندا ايتىلعان دەرەكتەرگە قاتىستى قىلمىستىق ءىس قوزعاۋ ماسەلەسىن سۇراعان بولاتىن. باس پروكۋراتۋرا وكىلدەرى دەرەكتەر تەكسەرۋ ءۇشىن ەكى ورگانعا جىبەرىلگەنىن ايتتى.

«باس پروكۋراتۋرا ءانشى دينارا ءالجاننىڭ جۋرناليست نۇرسەيىت جىلقىشىبايدىڭ «ۋاقىت كورسەتەدى» YouTube-ارناسىندا سۇحباتتا ايتىلعان بىرنەشە فاكتىلەرىن تەكسەرۋ بويىنشا اقپارات بەرۋ تۋرالى سۇراۋ سالۋدى قارادى. وسى فاكتىلەردى تەكسەرۋ ءۇشىن سۇراۋ قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگى جانە قازاقستان رەسپۋبليكاسى ىشكى ىستەر مينيسترلىگىنە جىبەرىلدى. اتالعان ورگاندار تەكسەرۋدىڭ ناتيجەسى تۋرالى حاباردار ەتەدى»، - دەلىنگەن رەسمي جاۋاپتا.

ەسكە سالايىق، بەلگىلى زاڭگەر الماس جۇماعالي بولات نازاربايەۆتىڭ بۇرىنعى توقالى «ۋاقىت كورسەتەدى» YouTube-ارناسىندا ايتقان دەرەكتەرگە قاتىستى قانداي قىلمىستىق ىستەر قوزعاۋعا بولاتىنىن ايتقان ەدى.

«بىرىنشىدەن، كەنتال (ءانشى تالعات كەنجەبولاتوۆ – ە س ك.) مەن «كومانداسىنىڭ» ەسىرتكىگە قاتىسى. ەكىنشىدەن، عابيدوللانىڭ (شىمكەنت قالاسىنىڭ ەكس-اكىمى عابيدوللا ءابدىراحىموۆ) قىزمەتتىك وكىلەتتىگىن اسىرا پايدالانۋ ما، الدە كاسىپكەرلىك قىزمەتكە زاڭسىز ارالاسۋ ما، ونى تەكسەرىس انىقتاۋ كەرەك. بولات نازاربايەۆتىڭ قارجىلاردى وڭدى-سولدى شاشۋى، كازينودان ۇتىلىپ قالعان قايرات نۇرتاس ءۇشىن 400000 دوللار بەرە سالۋى - قارجىنىڭ شىعۋ تەگىنىڭ زاڭدىلىعى انىقتالۋ كەرەك». ول ساندىراق ەمەس، جىلقىشىباي باسىندا سۇراپ الدى: «ەرتەڭ سوزدەرىڭىزدەن تايىپ، انا جەرىن، مىنا جەرىن الىپ تاستاشى»، - دەپ سۇرامايسىڭ با؟ - دەپ»، - دەگەن ەدى زاڭگەر.