ازەربايجاندا قازاقستاننىڭ مادەنيەت كۇندەرى وتەدى
بۇل تۋرالى ەلىمىزگە رەسمي ساپارمەن كەلگەن ازەربايجان پرەزيدەنتى يلحام اليەۆپەن كەڭەيتىلگەن قۇرامداعى كەزدەسۋ بارىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ەكى ەلدىڭ مادەني ونكۇندىكتەرىن وتكىزۋ تۋرالى ۋاعدالاستىقتى ايرىقشا اتاپ وتكىم كەلەدى. قازاقستاننىڭ مادەني كۇندەرى وسى جىلدىڭ ىشىندە وتەدى. بۇگىن ءبىز ازەربايجاننىڭ قۇرمەتتى پرەزيدەنتىمەن كورنەكتى مەملەكەت قايراتكەرى گەيدار اليەۆتىڭ اتىنداعى كوشەنى اشامىز. بۇل ءىس-شارانى ازەربايجان حالقىنىڭ ۇلى ۇلىنىڭ 100 جىلدىعىنا ورايلاستىرىپ وتىرمىز»، - دەدى مەملەكەت باسشىسى.
قاسىم-جومارت توقايەۆ بۇگىن گەيدار اليەۆتىڭ ومىرىنە ارنالعان «عازيز عۇمىر» دەرەكتى فيلمىنىڭ تانىستىرىلىمى وتەتىندىگىن ايتتى. فيلمدى قازاقستان تەلەراديو كورپوراتسياسى تۇسىرگەن.
«ەلدەرىمىزدىڭ دوستىعى مەن ءوزارا قولداۋىنىڭ جارقىن دالەلىنىڭ ءبىرى قازاق حالقىنىڭ ازەربايجانعا - فەزۋلي قالاسىندا قۇرمانعازى اتىنداعى بالالار شىعارماشىلىعى ورتالىعىن سىيعا تارتۋى بولماق. ماعان اتالعان ورتالىقتىڭ قۇرىلىسى بارىنشا جىلدام قارقىنمەن جۇرگىزىلىپ جاتقانىن ايتتى. مەنىشە، تاياۋ ارادا وسىناۋ ماڭىزدى نىساننىڭ جۇمىس ىستەي باستاعانىن كورەمىز. ءبىز مۇنان ارى دا جان-جاقتى گۋمانيتارلىق بايلانىستى دامىتۋعا، ورتاق رۋحاني قۇندىلىقتاردىڭ اسىل قازىناسىن بايىتۋعا نىق نيەتتىمىز»، - دەدى پرەزيدەنت.
