قازاقستان مەن ازەربايجان اراسىندا ءبىرقاتار ماڭىزدى قۇجاتقا قول قويىلادى
بۇل تۋرالى ەلىمىزگە رەسمي ساپارمەن كەلگەن ازەربايجان پرەزيدەنتى يلحام اليەۆپەن كەڭەيتىلگەن قۇرامداعى كەزدەسۋ بارىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ازەربايجان ءبىز ءۇشىن تەك سەنىمدى ءارى ماڭىزدى سەرىكتەس قانا ەمەس، سونىمەن بىرگە باۋىرلاس، جاقىن مەملەكەت. سانعاسىرلىق دوستىقتىڭ مىزعىماس بايلانىسىنا، ءوزارا قولداۋعا ارقا سۇيەي وتىرىپ، بۇگىندە ستراتەگيالىق سەرىكتەستىك جانە وداقتاستىق رۋحىندا دامىپ كەلە جاتقان مەملەكەتارالىق ءتيىمدى ىنتىماقتاستىقتى قالىپتاستىردىق. ەلدەر اراسىندا بەلسەندى، سەنىمدى ساياسي ديالوگ ورناعان. ۇكىمەتتىك دەڭگەيدە ۇيلەسىمدى جۇمىس جۇرگىزىلىپ، كوپجاقتى الاڭدار اياسىندا سىندارلى ءوزارا ءىس-قيمىل جۇزەگە اسىرىلۋدا»، - دەدى قاسىم-جومارت توقايەۆ.
قازاقستان پرەزيدەنتى ەكى مەملەكەت اراسىندا قوماقتى شارتتىق-قۇقىقتىق بازا قالىپتاسقانىن، ياعني 90 نان استام قۇجاتقا قازىردىڭ وزىندە قول قويىلعانىن اتاپ ءوتتى.
«وتكەن جىلى ءبىز ستراتەگيالىق ءوزارا قارىم-قاتىناستى نىعايتۋ جانە وداقتاستىق ءوزارا ءىس-قيمىلدى تەرەڭدەتۋ تۋرالى دەكلاراتسياعا، سونىمەن قاتار 2026-جىلعا دەيىن ىنتىماقتاستىقتى دامىتۋ كەشەندى باعدارلاماسىنا قول قويدىق. بۇگىندە ءبىرقاتار ماڭىزدى قۇجات قابىلدانادى»، - دەدى مەملەكەت باسشىسى.
ايتا كەتەيىك، قازاقستان مەن ازەربايجان پرەزيدەنتتەرى شاعىن قۇرامدا كەلىسسوز جۇرگىزدى.
