قازاقستاننان مۇنايدىڭ جەكەلەگەن تۇرلەرىن ەكسپورتتاۋعا تىيىم سالىندى

استانا. قازاقپارات - ەۋرازيالىق ەكونوميكالىق وداقتىڭ كەدەندىك اۋماعىنان تىس جەرلەرگە قازاقستاننان مۇنايدىڭ جەكەلەگەن تۇرلەرىن ەكسپورتتاۋعا تىيىم سالۋ تۋرالى ەنەرگەتيكا ءمينيسترىنىڭ بۇيرىعى كۇشىنە ەندى، دەپ حابارلايدى قازاقپارات ءتىلشىسى.

«وسى بۇيرىققا جالعانعان قوسىمشاعا سايكەس مۇناي ونىمدەرىنىڭ جەكەلەگەن تۇرلەرىن ەۋرازيالىق ەكونوميكالىق وداقتىڭ كەدەندىك اۋماعىنىڭ شەگىنەن تىس جەرلەرگە قازاقستان رەسپۋبليكاسىنىڭ اۋماعىنان اكەتۋگە 2024-جىلعى 31- جەلتوقسانعا دەيىنگى مەرزىمگە تىيىم سالۋ ەنگىزىلسىن. وسى بۇيرىقتىڭ ورىندالۋىن باقىلاۋ جەتەكشىلىك ەتەتىن قازاقستان رەسپۋبليكاسىنىڭ ەنەرگەتيكا ۆيتسە-مينيسترىنە جۇكتەلسىن»، - دەلىنگەن كۇشىنە ەنگەن بۇيرىقتا.

ەندى قازاقستاننان ە ا ە و- دان تىس جەرلەرگە مىنا مۇناي ونىمدەرىن ەكسپورتتاۋعا تىيىم سالىندى:

- جەڭىل ديستيللياتتار؛

- اۆياكەروسيندەر جانە ديزەل وتىنى؛

- گازويلدار؛

- تولۋول، كسيلولدار؛

- مۇناي بيتۋمى.

بۇل شەكتەۋ قازاقستاننىڭ ىشكى ناراعىنداعى مۇناي ونىمدەرى تاپشىلىعىنىڭ الدىن الۋ ماقساتىندا ەنگىزىلگەن.

ەسكە سالا كەتەيىك، تاياۋدا مينيسترلىك بيىل قازاقستاندا 850 مىڭ توننا ديزەل وتىنىنىڭ تاپشىلىعى بولۋى مۇمكىن ەكەنىن مالىمدەپ ەدى.