كيىز ءۇي سومكەنىڭ اۆتورى ۇلتتىق ويىنداردى پاتەنتتەپ جاتىر

استانا. قازاقپارات - اقتوبەلىك ونەرپاز اينۇر پولاتوۆا ۇلتتىق ويىنداردى قايتا جانداندىرىپ، ترەندكە اينالدىرماق. بۇگىندە جەرلەسىمىزدىڭ اۆتورلىق جۇمىسىنا ايگىلى Louis Vuitton ءسان ءۇيى قىزىعۋشىلىق تانىتىپ وتىر.

وسى ورايدا قازاقپارات ءتىلشىسى جاس تالانت يەسىمەن اڭگىمە-دۇكەن قۇرعان ەدى.

«تالاپاي» اتتى جوبامدى، برەندىمدى جارتى جىل بۇرىن اشتىم. وعان سەبەپ - قازىر كوپتەگەن ءدامحانا، كوفەحانا كەلۋشىلەرگە ءتۇرلى ويىندار ۇسىنىپ جاتادى. اسىرەسە جاستار ءجيى جۇرەتىن جەرلەردە. ءبىراق، ول ويىنداردىڭ بارلىعى شەتەلدەن كەلگەن. سوعان قاراپ ءوزىمىزدىڭ ويىندار ەسىمە ءتۇستى. قازاقتىڭ نەبىر ۇلتتىق ويىندارى دا بار ەمەس پە، نەگە سولاردى قايتا جانداندىرماسقا دەگەن وي كەلدى. ءسويتىپ، ۇلتتىق ويىندارمەن تەرەڭىرەك تانىسۋدى باستادىم، ەتنوگرافتاردان كەڭەس سۇراپ، ءۇش ايدان سوڭ ءوز جوبامدى ويلاپ شىعاردىم. ناتيجەسىندە بەس ۇلتتىق ويىندى قايتا جانداندىردىم»، - دەيدى اينۇر پولاتوۆا.

جوبا اۆتورى يدەياسىن كوپشىلىككە تانىتۋ، ۇسىنۋ ءۇشىن ءتۇرلى جولمەن جارنامالاپ، جەلىدە جاريالاي باستاعان. دەگەنمەن ودان ناتيجە شىعا قويماعان.

كەيىن تانىسىنىڭ كەڭەسىنە قۇلاق اسىپ، Louis Vuitton ءسان ۇيىنە ءوز جوباسىن ۇسىنىپ حات جازعان.

«ارينە، الەمدىك دەڭگەيدەگى كومپانيا جاۋاپ بەرەدى دەپ كۇتكەن جوقپىن. اراعا ەكى اپتا سالىپ Louis Vuitton-نان وڭ جاۋاپ كەلدى، فرانسياعا يدەيامدى تالقىلاۋعا شاقىردى. ءبارى ويداعىداي بولادى دەگەن ۇمىتتەمىن. ويىندارعا كەلسەك، بۇل بۇرىننان بار دۇنيە. مەن بەس ويىننىڭ ىشىندە تەك ءبىر ويىندى ءوزىم ويلاپ تاپتىم. ول ءۇشىن ءبىراز ءوز بەتىمشە ىزدەندىم»، - دەيدى ول.

اينۇر قازىر ەلوردادا ماگيستراتۋرانىڭ 1-كۋرسىندا وقىپ جاتىر. ونىڭ ماماندىعىنىڭ ديزاين مەن سانگە قاتىسى جوق.

باستاپقى ماماندىعى - فيلولوگ (قازاق ءتىلى مەن ادەبيەتى).

«الداعى ۋاقىتتا ءىسىمدى دامىتىپ، استانا جانە الماتى قالاسىندا ءوز دۇكەنىمدى نەمەسە بۋتيگىمدى اشۋ ويدا بار. سەبەبى وسى ەكى قالادان سۇرانىس جوعارى. سونىمەن قاتار تەك ۇلتتىق ويىندارمەن شەكتەلمەي، باسقا باعىتتاردى دا قوسىمشا دامىتقىم كەلەدى. بۇگىندە اۆتورلىق قۇقىق، پاتەنت الۋ وتە ماڭىزدى. سوندىقتان ول جاعىن قازىردەن قاراستىرىپ جاتىرمىن. «قازپاتەنت» مەكەمەسىنە اۆتورلىق بويىنشا ءوتىنىش بەرىپ قويدىم، جاۋابىن كۇتىپ ءجۇرمىن. Louis Vuitton كومپانياسىنا اۆتورلىق قۇقىقپەن بارعانىم الدەقايدا ىڭعايلى. تاعى ءبىر جايت، اتالعان ءسان ۇيىمەن كەلىسپەگەننىڭ وزىندە ءىسىمدى ودان ءارى جالعاستىرا بەرەمىن»، - دەيدى جەرلەسىمىز.

سونىمەن قاتار، ونەرپاز ەلورداعا كوشۋ جانە جەكە باسىنا قاتىستى ءمان- جايدى اڭگىمەلەپ بەردى.

«مەن بۇعان دەيىن الماتىدا تۇردىم. وكىنىشكە قاراي، قاتەرلى ىسىك دياگنوزى قويىلىپ، ءبىراز ۋاقىت ەمدەلدىم. ەمدى جالعاستىرۋ ءۇشىن استاناعا كوشىپ كەلدىم. ەلوردادا حيميالىق تەراپيادان كەيىن قاتەرلى ىسىكتىڭ مۇلدە جوق ەكەنى انىقتالدى. بۇل ماعان وتە اۋىر ءتيدى، سەبەبى قانشا ۋاقىت ەم الدىم، سويتسەم ول جالعان ەكەن. وسىدان كەيىن جۇرتقا، قوعامعا پايدامدى تيگىزگىم كەلىپ، جەكە جوبامدى قولعا الدىم. ەڭبەگىمدى ودان ءارى كوپشىلىككە تانىتۋ، ىلگەرىلەتۋ ءۇشىن ءبىراز جەرگە حابارلاسىپ، ءتۇرلى جارناما دا جاسادىم، ءبىراق ناتيجە بولمادى. بۇل جەردە كاسىبىمدى ساتىپ، پايدا تابۋ ماقساتى جوق. ماعان پايدا بىلاي دا ءتۇسىپ جاتىر. ماسەلە ۇلتتىق قۇندىلىقتا»، - دەيدى جاس تالانت يەسى.

جاس ونەرپازدىڭ ازىرگە كومانداسى جوق، بارلىق جۇمىسقا ءوزى جاۋاپ بەرەدى.

سول سياقتى وتانداسىمىز Louis Vuitton ءسان ۇيىمەن بىرلەسىپ جۇمىس ىستەۋگە 50/50 دەڭگەيىندە ءۇمىت ارتىپ وتىر.

دەگەنمەن بولماعان جاعدايدا دا قايمىعىپ وتىرعان اينۇر جوق، ياعني ءىسىن ودان ءارى جالعاستىرا بەرمەك.

«ارينە، فرانسۋز ءسان ۇيىمەن وڭ كەلىسىم جاسالعاننىڭ وزىندە ولار ماعان بەلگىلى ءبىر تالاپتار قويادى. بۇل اۆتورلىق قۇقىققا بايلانىستى. دەگەنمەن مەنىڭ دە ولارعا دەگەن ءوز تالاپتارىم بولادى، سەبەبى يدەيا مەنىكى»، - دەيدى جوبا اۆتورى.

ايتپاقشى، اينۇردىڭ مالىمەتىنشە، ونىڭ اۆتورلىق جوباسىنا تۇركيا، نيدەرلاند، نورۆەگيا سەكىلدى ەلدەردەن ۇسىنىس تۇسكەن.

ودان بولەك، Google كومپانياسىندا ەڭبەك ەتىپ جاتقان جەرلەستەرىمىزدەن دە سۇرانىس بار.

سونداي- اق، تالانتتى جەرلەسىمىز اكادەميالىق موبيلدىلىكتى ارتتىرۋ ماقساتىندا گەرمانياعا ايلىق وقۋعا بارعالى جاتىر.

ەسكە سالايىق، كيىز ءۇي تۇرىندە سومكە جاسايتىن قازاقستاندىقتىڭ جوباسىنا Louis Vuitton ءسان كومپانياسىنىڭ قىزىعۋشىلىق تانىتقانىن حابارلاعان ەدىك.

اتاپ ايتقاندا، جەرلەسىمىز «بەس تاس»، «قۇمار»، «اعاش ءۇي» بەستەمشەسى، «تۇمار» بەستەمشەسى، «توعىزقۇمالاق» ويىندارىن قازاقتىڭ ويۋ ورنەگى بار فۋنكسيونالدى قورجىن تۇرىندە ۇسىنىلعان.

ەسكە سالايىق، ويىنداردىڭ نۇسقاۋلىعى ءۇش تىلدە جازىلعان (قازاقشا، ورىسشا، اعىلشىنشا).

ودان بولەك، اقتوبەلىك تالانت يەسىنىڭ ايتۋىنشا، Louis Vuitton-نان شاقىرتۋ العاننان كەيىن اۆتورلىق جوباسىن ساتىپ الۋعا قاتىستى بىرنەشە ۇسىنىس ءتۇسىپ، بەلگىلى ءبىر سوما دا ۇسىنىلعان.