قىزعالداقتار تۇركىستان توپىراعىن ءتۇرلى-ءتۇستى «تەكەمەتكە» اينالدىردى
تۇركىستان وبلىسىنىڭ كەي ايماقتارىندا وسكەن قىزعالداقتاردان جەرلەر قىزىل كىلەمدەي كەيىپكە ەنىپ جاتىر. اسىرەسە، «باتىس ەۋروپا - باتىس قىتاي» كولىك ءدالىزىنىڭ ورداسباسى اۋدانىنا قاراستى بولىگىندە جايقالىپ وسكەن قىزعالداقتار كوز قىزىقتىرادى. ال، الداعى بىرەر اپتادا تۇلكىباس اۋدانىنا قاراستى شۇباي قىزىل شوقىسىندا دا قىزعالداقتار گۇلدەپ، اۋماققا اسەم كورىنىس سىيلايدى.
«قازاقستاندا كەزدەسەتىن 38 ءتۇرلى قىزعالداقتىڭ 18- ءى قىزىل كىتاپقا ەنگەن. سونىڭ ىشىندەگى گرەيگ، كاۋفمان قىزعالداقتارى تۇلكىباس، ورداباسى، بايدىبەك اۋداندارىنىڭ اۋماعىندا كەزدەسىپ جاتىر. مۇنان بولەك، جاقىن ارادا جابايى قىزعالداقتاردا ءوسىپ شىعادى. جالپى، وڭىردە قىزعالداق القابى جىلدان جىلعا كوبەيىپ كەلەدى» - دەيدى تۇركىستان ولىسى ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ ءبولىم باسشىسى نۇرداۋلەت ورازىمبەتوۆ.
بۇگىندە ءتارتىپ ساقشىلارى مەن ورمان شارۋاشىلىعىنىڭ ماماندارى بىرلەسىپ، القاپتاردا ءوسىپ تۇرعان قىزعالداقتاردى قورعاۋ جۇمىستارىن اتقارۋدا. اسىرەسە، قىزىقتاۋعا كەلگەن ازاماتتارعا قىزعالداقتى جۇلۋعا بولمايتىندىعىن ءتۇسىندىرىپ جاتىر.
ايتا كەتەيىك، بۇدان الدىن قىزعالداق جۇلعانداردىڭ ارەكەتى الەۋمەتتىك جەلىدە تاراعان بولاتىن. ازىرگە، تۇركىستان پوليتسياسى ولاردىڭ جەكە باسىن انىقتاپ جاتىر.
اۆتور
قايرات زاينيشيەۆ
